រថយន្ត ១គ្រឿង ត្រូវបានដុត នៅក្បែររដ្ឋសភានៃប្រទេសទួរគី នាថ្ងៃអង្គារ (ទី១៩ ខែសីហា)នេះ ជាការរំលឹកឡើងវិញដ៏អាក្រក់នូវការមានជម្លោះជាច្រើនទសវត្សរ៍ជាមួយគណបក្សពលករឃឺដ (PKK) ដោយហេតុការណ៍នេះបានកើតមានឡើងតែប៉ុន្មានម៉ោង មុនពេលក្រុមគ្រួសារនៃជនរងគ្រោះមួយចំនួនត្រូវទៅនិយាយប្រាប់គណៈកម្មការត្រួតពិនិត្យការរំសាយអាវុធរបស់ក្រុមនេះ។

PKK ដែលបានកាន់អាវុធតស៊ូប្រឆាំងនឹងរដ្ឋទួរគី ក្នុងឆ្នាំ១៩៨៤ បានបញ្ជាក់កាលពីខែឧសភាថា ខ្លួននឹងទម្លាក់អាវុធ ហើយរំលាយក្រុម។ គណៈកម្មាការសភា ត្រូវបានបង្កើតឡើងក្នុងខែនេះ ដើម្បីកំណត់ផ្លូវឆ្ពោះទៅរកសន្តិភាពយូរអង្វែង ដែលនឹងជះឥទ្ធិពលផងដែរទាំងនៅក្នុងប្រទេសជិតខាងអ៊ីរ៉ាក់ និងស៊ីរី។

យោងតាមរូបភាពពីប្រព័ន្ធផ្សព្វផ្សាយក្នុងស្រុក បានបង្ហាញឲ្យឃើញរថយន្តម៉ាក Renault Toros ពណ៌ស ត្រូវបានភ្លើងឆាបឆេះក្នុងរយៈពេលខ្លី នៅខាងក្រៅទ្វារសំខាន់របស់សភា នាព្រឹកថ្ងៃអង្គារនេះ។

តែយ៉ាងណាក្ដី ក្រសួងមហាផ្ទៃបានបញ្ជាក់ថា បុរសម្នាក់ដែលត្រូវបានចាប់ឃុំខ្លួនពីបទដុតរថយន្តនោះ មានបញ្ហាផ្លូវចិត្ត និងមានប្រវត្តិឧក្រិដ្ឋកម្មពីមុនផងដែរ ដោយបន្ថែមថា រូបគេបានធ្វើដូច្នេះ ដើម្បីតវ៉ាជំទាស់នឹងច្បាប់លើកទឹកចិត្ត សម្រាប់ការបង់ពន្ធរបស់រថយន្តចាស់ៗ។

គួររំលឹកថា កាលពីទសវត្សរ៍ឆ្នាំ១៩៩០ អំឡុងស្ថិតនៅក្នុងដំណាក់កាលដ៏បង្ហូរឈាមបំផុតនៃជម្លោះជាមួយ PKK រថយន្ត Renault Toros បានមានភាពល្បីល្បាញ នៅភាគអាគ្នេយ៍ប្រទេសទួរគី ដែលមានជនជាតិឃឺដរស់នៅច្រើន ដោយរថយន្តម៉ាកនេះត្រូវបានផ្សារភ្ជាប់ទៅនឹងការចាប់ពង្រាត់ និងការសម្លាប់ក្រៅប្រព័ន្ធតុលាការដែលត្រូវបានស្តីបន្ទោសទៅលើក្រុមមានទំនាក់ទំនងជាមួយរដ្ឋ។ មនុស្សជាង ៤០.០០០នាក់ ត្រូវបានសម្លាប់នៅក្នុងការប្រយុទ្ធគ្នាជាង ៤ទសវត្សរ៍នេះ៕