អាជ្ញាធរនៅទីក្រុងគីវ នៅថ្ងៃអង្គារ (ទី១៩ ខែសីហា) នេះ បានឲ្យដឹងថា ប្រទេសរុស្ស៊ី បានប្រគល់សាកសពទាហាន ១.០០០នាក់ទៅឲ្យអ៊ុយក្រែន ដោយក្នុងនោះ ៥នាក់ បានស្លាប់ ក្នុងអំឡុងពេលកំពុងជាប់ឃុំ នៅរុស្ស៊ី។

ទីស្នាក់ការកណ្តាលសម្របសម្រួលរបស់អ៊ុយក្រែន សម្រាប់ការព្យាបាលអ្នកទោសសង្គ្រាម ឬឈ្លើយសឹក បានឲ្យដឹងថា ការដោះដូរនេះ គឺជាផ្នែកមួយនៃកិច្ចព្រមព្រៀងដែលសម្រេចបាន ក្នុងអំឡុងពេលកិច្ចចរចាសន្តិភាពរុស្ស៊ី-អ៊ុយក្រែន ដែលបានធ្វើឡើងនៅទីក្រុងអ៊ីស្តង់ប៊ុល ប្រទេសទួរគី កាលពីដើមរដូវក្តៅនេះ។

ទីភ្នាក់ងារនេះបានបញ្ជាក់ថា ទាហានទាំងនោះបានស្លាប់នៅក្នុងតំបន់ Donetsk, Luhansk និង Zaporizhzhia ភាគអាគ្នេយ៍នៃប្រទេសអ៊ុយក្រែន ក៏ដូចជានៅតំបន់ព្រំដែន Kursk ភាគនិរតីនៃប្រទេសរុស្ស៊ី ជាទីដែលកងកម្លាំងអ៊ុយក្រែនបានកាន់កាប់រយៈពេលខ្លី បន្ទាប់ពីមានការលុកលុយដ៏គួរឲ្យភ្ញាក់ផ្អើលកាលពីខែសីហាឆ្នាំមុន។ ទីក្រុងមូស្គូមិនទាន់បានធ្វើអត្ថាធិប្បាយអ្វីឡើយ លើការផ្លាស់ប្តូរនេះ។

ទីភ្នាក់ងារសារព័ត៌មានរដ្ឋ TASS ដែលដកស្រង់ប្រភពមិនបញ្ចេញឈ្មោះមួយ បានរាយការណ៍ថា ប្រទេសរុស្ស៊ីទទួលបានសាកសពទាហានចំនួន ១៩នាក់ នៅថ្ងៃអង្គារ។

ទីស្នាក់ការកណ្តាលអ៊ុយក្រែនបានប្រាប់ថា សាកសពចំនួន ៥នាក់ ក្នុងចំណោមសាកសពដែលត្រូវបានធ្វើមាតុភូមិនិវត្តន៍នេះ មាននៅក្នុងបញ្ជីនៃទាហានដែលរងរបួសធ្ងន់ធ្ងរ និងឈឺធ្ងន់ ដែលនឹងត្រូវជាផ្នែកមួយនៃការដោះដូរអ្នកទោសសង្គ្រាម។

ក្នុងអំឡុងកិច្ចពិភាក្សា នៅទីក្រុងអ៊ីស្តង់ប៊ុល កាលពីខែមិថុនា ទីក្រុងមូស្គូ និងគីវ បានព្រមព្រៀងគ្នាឲ្យមានការដោះដូរអ្នកទោសទ្រង់ទ្រាយធំ និងការប្រគល់សាកសពទាហានចំនួន ៦.០០០នាក់ ពីភាគីម្ខាងៗ។ តែភាគីទាំង២ បានបរាជ័យក្នុងការឈានដល់កិច្ចព្រមព្រៀងបទឈប់បាញ់៕