គ្រោះរាំងស្ងួតនៅខេត្តភាគពាយ័ព្យ Tekirdag ប្រទេសទួរគី បានធ្វើឲ្យអាងស្តុកទឹកដ៏សំខាន់នៅតំបន់នោះ លែងអាចទ្រទ្រង់បានទៀតហើយ និងធ្វើឲ្យផ្ទះសម្បែងប្រជាពលរដ្ឋគ្មានទឹកប្រើប្រាស់អស់រយៈពេលជាច្រើនសប្តាហ៍មកហើយ ដោយសារការធ្លាក់ចុះចំនួនទឹកភ្លៀងយ៉ាងឆាប់រហ័សក្នុងឆ្នាំនេះ ។

ក្រុមអាជ្ញាធរនិយាយថា គ្រោះរាំងស្ងួតគឺជាបញ្ហាសំខាន់នៅក្នុងប្រទេសទួរគី ក្នុងនោះខេត្តជាច្រើនបានព្រមានពីការផ្គត់ផ្គង់ទឹកសាបមានដែនកំណត់នៅរដូវក្តៅនេះ ។

តំបន់ជាច្រើននៅខេត្ត Izmir ដែលជាខេត្តមានប្រជាពលរដ្ឋរស់នៅច្រើនបំផុតលំដាប់ទី ៣របស់ទួរគី បានមើលឃើញការកាត់ផ្តាច់ការផ្គត់ផ្គង់ទឹកញឹកញាប់ក្នុងខែនេះ ខណៈទីក្រុងនៅខេត្តភាគខាងលិច Usak ត្រូវបានគេជូនដំណឹងថា ពួកគេនឹងទទួលបានទឹកត្រឹមតែរយៈពេល ៦ម៉ោងប៉ុណ្ណោះ ក្នុង ១ថ្ងៃ ស្របពេលដែលអាងស្តុកទឹកសំខាន់ រីងហួតស្ងួតហែង ។

យោងតាមការអះអាងរបស់សេវាកម្មឧតុនិយមទួរគី បានឲ្យដឹងថា ភ្លៀងធ្លាក់បានធ្លាក់ចុះចំនួន ៧១ភាគរយនៅក្នុងខែកក្កដានៅទូទាំងប្រទេស ហើយនៅតំបន់ Marmara ដែលរួមមានទាំងទីក្រុង Tekirdag និងទីក្រុង Istanbul ចំនួនភ្លៀងធ្លាក់បានធ្លាក់ចុះ ៩៥ភាគរយ ពីក្រោមកម្រិតធម្មតាប្រចំាខែ ក្នុងខែកក្កដា ។

ក្នុងរយៈពេល ១០ខែ គិតត្រឹមខែសីហានេះ ភ្លៀងធ្លាក់បានធ្លាក់ចុះចំនួន ៣២ភាគរយនៅតំបន់ Marmara ខណៈដែលវាធ្លាក់ចុះចំនួន ២៦ភាគរយនៅទូទាំងប្រទេសទួរគី ដែលជាកម្រិតទឹកភ្លៀងទាបបំផុត ក្នុងរយៈពេល ៥២ឆ្នាំ ។

កម្រិតទឹកនៅអាងស្តុបទឹក Naip ស្ថិតក្នុងខេត្ត Tekirdag ដែលពុំមានភ្លៀងធ្លាក់ទាល់តែសោះក្នុងខែមិថុនា និងខែកក្កដា បានធ្លាក់ចុះដល់កម្រិតសូន្យភាគរយនៅខែសីហានេះ ។

គ្រោះរាំងស្ងួតនេះហើយ បង្ខំឲ្យក្រុមអាជ្ញាធរ ស្វែងរកជម្រើសផ្សេង ដូចជាការផ្តល់ទឹកធារាសាស្រ្ត សម្រាប់ការប្រើប្រាស់ក្នុងស្រុក ហើយនិងបង្កើតប្រព័ន្ធបូមទឹកសម្រាប់ការចែកចាយដល់តំបន់ជនបទ ៕