ប្រធានាធិបតីសហរដ្ឋអាមេរិកលោក Donald Trump បាននិយាយកាលពីថ្ងៃអង្គារថា លោកបានច្រានចោលការដាក់ទាហានជើងគោកសហរដ្ឋអាមេរិកក្នុងប្រទេសអ៊ុយក្រែន ប៉ុន្តែបាននិយាយថា សហរដ្ឋអាមេរិកអាចនឹងផ្តល់ការគាំទ្រតាមដែនអាកាសជាផ្នែកនៃកិច្ចព្រមព្រៀងដើម្បីបញ្ចប់សង្រ្គាមរបស់រុស្ស៊ីនៅអ៊ុយក្រែន។

មួយថ្ងៃបន្ទាប់ពីលោក Trump បានសន្យាធានាសន្តិសុខដើម្បីជួយបញ្ចប់សង្រ្គាមក្នុងកិច្ចប្រជុំកំពូលនៅសេតវិមាន ផ្លូវឈានឆ្ពោះទៅរកសន្តិភាពនៅតែមិនប្រាកដប្រជា ខណៈសហរដ្ឋអាមេរិក និងសម្ព័ន្ធមិត្ត បានត្រៀមដោះស្រាយនូវអ្វីដែលជាការគាំទ្រផ្នែកយោធាសម្រាប់អ៊ុយក្រែន។

លោក Trump បាននិយាយនៅក្នុងបទសម្ភាសន៍ក្នុងកម្មវិធី «Fox & Friends»របស់ប្រព័ន្ធផ្សព្វផ្សាយ Fox News ថា «នៅពេលនិយាយអំពីសន្តិសុខ អឺរ៉ុបមានឆន្ទៈក្នុងការដាក់ពង្រាយកងទ័ពជើងគោក។ យើងមានឆន្ទៈក្នុងការជួយពួកគេក្នុងរឿងនេះ ជាពិសេសប្រហែលជាតាមដែនអាកាស។

កងទ័ពអាកាសអ៊ុយក្រែនបាននិយាយថា បន្ទាប់ពីកិច្ចប្រជុំកំពូលកាលពីថ្ងៃចន្ទ រុស្ស៊ីបានចាប់ផ្តើមការវាយប្រហារតាមអាកាសក្នុងទ្រង់ទ្រាយធំបំផុតក្នុងរយៈពេលជាងមួយខែមកនេះទៅលើអ៊ុយក្រែន ដោយយានដ្រូនចំនួន២៧០គ្រឿងនិងមីស៊ីលចំនួន១០គ្រាប់។ ក្រសួងថាមពលបាននិយាយថា ការវាយប្រហារនេះបានបង្កឲ្យមានអគ្គិភ័យឆេះយ៉ាងសន្ធោសន្ធៅនៅរោងចក្រថាមពលក្នុងតំបន់ Poltava ភាគកណ្តាល ជាទីតាំងរោងចក្រចម្រាញ់ប្រេងតែមួយគត់របស់ប្រទេសអ៊ុយក្រែន។

លោក Trump បានទទួលស្គាល់ថា ប្រធានាធិបតីរុស្ស៊ី លោក Vladimir Putin ប្រហែលជាមិនចង់ឲ្យមានកិច្ចព្រមព្រៀងនោះទេ ដោយនិយាយថា «យើងនឹងស្វែងយល់អំពីលោកប្រធានាធិបតី Putin នៅប៉ុន្មានសប្តាហ៍ខាងមុខនេះ»។ ការគាំទ្រតាមដែនអាកាសអាចមានទម្រង់ជាច្រើន ដូចជាប្រព័ន្ធការពារមីស៊ីល ឬយន្តហោះចម្បាំងដែលអនុវត្តនៅតំបន់គ្មានការហោះហើរ។