សេតវិមានបានចាប់ផ្តើមគណនី TikTok កាលពីថ្ងៃអង្គារ ខណៈប្រធានាធិបតី លោក Donald Trump បន្តអនុញ្ញាតឱ្យវេទិកាគ្រប់គ្រងដោយជនជាតិចិនដើម្បីធ្វើប្រតិបត្តិការនៅក្នុងសហរដ្ឋអាមេរិក ទោះបីជាច្បាប់តម្រូវឱ្យលក់ក្រុមហ៊ុននេះក៏ដោយ។ ក្រុមហ៊ុនTikTok គ្រប់គ្រងដោយក្រុមហ៊ុនអ៊ីនធឺណិត ByteDance មានមូលដ្ឋាននៅប្រទេសចិន។

ច្បាប់សហព័ន្ធតម្រូវឱ្យលក់ក្រុមហ៊ុន TikTok បើមិនដូច្នេះទេត្រូវហាមឃាត់ដោយផ្អែកលើមូលដ្ឋានសន្តិសុខជាតិ ហើយត្រូវចូលជាធរមានមួយថ្ងៃមុនការឡើងកាន់តំណែងរបស់លោក Trump នៅថ្ងៃទី២០ ខែមករា។ ប៉ុន្តែសមាជិកគណបក្សសាធារណរដ្ឋរូបនេះ ដែលយុទ្ធនាការបោះឆ្នោតឆ្នាំ២០២៤ ពឹងផ្អែកខ្លាំងលើប្រព័ន្ធផ្សព្វផ្សាយសង្គម និងជាអ្នកដែលបាននិយាយថាលោកចូលចិត្ត TikTok បានដាក់បម្រាមនោះឲ្យផ្អាកវិញ។

នៅពាក់កណ្តាលខែមិថុនា លោក Trump បានបន្ថែមពេលកំណត់សម្រាប់កម្មវិធីចែករំលែកវីដេអូដ៏ពេញនិយមមួយនេះរយៈពេល៩០ថ្ងៃទៀត ដើម្បីស្វែងរកអ្នកទិញដែលពុំមែនជាជនជាតិចិន បើមិនដូច្នេះទេត្រូវបានហាមឃាត់នៅក្នុងសហរដ្ឋអាមេរិក ខណៈការបន្ថែមពេលនោះនឹងផុតកំណត់នៅពាក់កណ្តាលខែកញ្ញា។

គណនីផ្លូវការរបស់ Trump នៅលើបណ្តាញ X ជាអតីតបណ្តាញTwitter មានអ្នកតាមដាន១០៨,៥លាននាក់ ខណៈប្រព័ន្ធផ្សព្វផ្សាយសង្គមដែលលោកពេញចិត្តគឺ Truth Social មានអ្នកតាមដានត្រឹមតែ១០,៦ លាននាក់។ គណនីសេតវិមានផ្លូវការនៅលើបណ្តាញX និងInstagram មានអ្នកតាមដាន២,៤លាននាក់ និង៩,៣លាននាក់នីមួយៗ។