យោងតាមអ្នកនាំពាក្យរដ្ឋាភិបាលខេត្ត Ahmadullah Muttaqi និងនគរបាលក្នុងតំបន់បានឲ្យដឹងថា មនុស្សយ៉ាងហោចណាស់៧១នាក់រួមមានកុមារ១៧នាក់បានស្លាប់នៅភាគខាងលិចប្រទេសអាហ្វហ្គានីស្ថាន បន្ទាប់ពីរថយន្តក្រុងដឹកជនភៀសខ្លួនដែលទើបនិរទេសចេញពីប្រទេសជិតខាងអ៊ីរ៉ង់ បានឆេះបន្ទាប់ពីបានបុកជាមួយរថយន្តដឹកទំនិញនិងម៉ូតូ។

នគរបាលនៅក្នុងខេត្តHerat បាននិយាយកាលពីថ្ងៃអង្គារថា ឧបទ្ទវហេតុនេះគឺដោយសារតែរថយន្តក្រុង «បើកបរហួសល្បឿនកំណត់ និងធ្វេសប្រហែស»។ អ្នកនិរទេសគឺជាជនជាតិអាហ្វហ្គានីស្ថានដែលត្រូវបាននិរទេស ឬបង្ខំឲ្យចាកចេញពីប្រទេសអ៊ីរ៉ង់ ក្នុងប៉ុន្មានខែថ្មីៗនេះ។

ឧបទ្ទវហេតុនេះ បានកើតឡើងមួយថ្ងៃបន្ទាប់ពីរដ្ឋមន្ត្រីក្រសួងមហាផ្ទៃអ៊ីរ៉ង់លោក Eskandar Momeni បានប្រកាសថាមនុស្ស៨០០.០០០នាក់ នឹងត្រូវចាកចេញពីប្រទេសនេះនៅខែមីនាឆ្នាំក្រោយ។

មន្ត្រីខេត្ត បានប្រាប់ទីភ្នាក់ងារព័ត៌មានថា រថយន្តក្រុងនេះដឹកជនជាតិអាហ្វហ្គានីស្ថានដែលវិលត្រឡប់មកពីប្រទេសអ៊ីរ៉ង់ ហើយកំពុងធ្វើដំណើរទៅកាន់រដ្ឋធានីកាប៊ុល។ អ្នកដំណើរទាំងអស់បានឡើងជិះរថយន្ត នៅក្រុងIslam Qala ជាចំណុចឆ្លងកាត់ព្រំដែន។

គ្រោះថ្នាក់ចរាចរណ៍គឺជារឿងធម្មតានៅក្នុងប្រទេសអាហ្វហ្គានីស្ថាន ដោយសារកំណាត់ផ្លូវមិនល្អបន្ទាប់ពីសង្គ្រាមរាប់ទសវត្សរ៍ ការបើកបរមានស្ថានភាពគ្រោះថ្នាក់នៅលើផ្លូវហាយវ៉េ និងកង្វះបទប្បញ្ញត្តិ។ កាលពីខែធ្នូ ឆ្នាំមុន គ្រោះថ្នាក់រថយន្តក្រុងពាក់ព័ន្ធនឹងរថយន្តដឹកប្រេងនិងរថយន្តដឹកទំនិញនៅលើផ្លូវហាយវ៉េ បានសម្លាប់មនុស្សយ៉ាងហោចណាស់៥២នាក់ ។