ប្រទេសកាតា ដែលជាអ្នកសម្រុះសម្រួលដ៏សំខាន់ក្នុងជម្លោះអ៊ីស្រាអែល-ប៉ាឡេស្ទីន បានសង្កត់ធ្ងន់កាលពីថ្ងៃអង្គារ (១៩ សីហា) ទៅលើភាពបន្ទាន់នៃការសម្រេចកិច្ចព្រមព្រៀងបទឈប់បាញ់ក្នុងតំបន់ហ្កាហ្សា បន្ទាប់ពីក្រុមហាម៉ាស បង្ហាញពី "ការឆ្លើយតបជាវិជ្ជមាន" ចំពោះសំណើចុងក្រោយបំផុតពីបណ្តាប្រទេសអារ៉ាប់ ប៉ុន្តែអ៊ីស្រាអែល មិនទាន់ថ្លឹងថ្លែងរួចនៅឡើយ ខណៈយោធារបស់ខ្លួនរៀបចំការវាយលុកលើតំបន់មួយចំនួនដែលមានប្រជាជនរស់នៅច្រើនបំផុតក្នុងដែនដីហ៊ុព័ទ្ធមួយនេះ។

លោក Majed Al-Ansari អ្នកនាំពាក្យក្រសួងការបរទេសកាតា បានប្រាប់អ្នកសារព័ត៌មានថា "ប្រសិនបើសំណើបទឈប់បាញ់ចុងក្រោយបរាជ័យទៀត នោះវិបត្តិហ្កាហ្សានឹងកាន់តែធ្ងន់ធ្ងរឡើង" ដោយបន្ថែមថា ពួកគេមិនទាន់ទទួលបានការឆ្លើយតបពីអ៊ីស្រាអែលនៅឡើយ។ លោក Al-Ansari និយាយថា ក្រុមហាម៉ាស យល់ព្រមលើលក្ខខណ្ឌកំពុងពិភាក្សានេះហើយ ប៉ុន្តែបដិសេធមិនលម្អិតទេ គ្រាន់តែនិយាយថា សំណើថ្មីនេះ "ស្ទើរតែដូចគ្នា" នឹងសំណើពីមុនដោយប្រេសិតអាមេរិក លោក Steve Witkoff ។

គួរឱ្យដឹងថា សំណើរបស់អាមេរិកពីមុននោះ គឺជាបទឈប់បាញ់រយៈពេល ៦០ថ្ងៃ ក្នុងអំឡុងពេលដែលចំណាប់ថ្នូរនៅសេសសល់មួយចំនួននឹងត្រូវដោះលែង ហើយភាគីជម្លោះនឹងបន្តចរចាអំពីបទឈប់បាញ់ដ៏យូរអង្វែង និងការវិលត្រលប់មកវិញនៃអ្នកជាប់ឃុំក្នុងដៃក្រុមហាម៉ាសទាំងអស់។

ពន្លឺនៃបទឈប់បាញ់នេះកើតឡើងស្របពេលការរំពឹងទុកនៃយុទ្ធនាការវាយលុកបន្ថែមទៀតពីអ៊ីស្រាអែល លើទីក្រុងហ្កាហ្សា និងតំបន់ផ្សេងទៀត ដែលផ្តល់ជម្រកដល់ជនស៊ីវិលរាប់សែននាក់ ដែលបង្កឱ្យមានការខឹងសម្បារជាអន្តរជាតិ។ អ្នកស្រុកប៉ាឡេស្ទីននិយាយថា ពុំមានកន្លែងណាត្រូវរត់ភៀសខ្លួនទៀតទេ បន្ទាប់ពីសង្រ្គាមរយៈពេល ២២ខែ ដែលបានសម្លាប់មនុស្សរាប់ម៉ឺននាក់រួចមកហើយ និងបានបំផ្លាញទឹកដីភាគច្រើននៃតំបន់ហ្កាហ្សាដ៏តូចចង្អៀតមួយនេះ៕