មន្ត្រីបាននិយាយកាលពីថ្ងៃអង្គារសប្ដាហ៍នេះថា មនុស្ស ៨ នាក់បានស្លាប់ និងរាប់រយនាក់ត្រូវបានជម្លៀសចេញពីលំនៅឋានក្នុងរយៈពេលពីរ ឬបីថ្ងៃ ចុងក្រោយនេះ ខណៈភ្លៀងធ្លាក់ខ្លាំងបានវាយប្រហារស្រុកជាច្រើននៃរដ្ឋ មហារាស្ត្រ (Maharashtra) ដែលបណ្តាលឱ្យមានទឹកជំនន់ បិទផ្លូវ និងការខូចខាតធ្ងន់ធ្ងរដល់ដំណាំ។  

នៅទីក្រុង Mumbai ដែលជាទីក្រុងហិរញ្ញវត្ថុរបស់ប្រទេសឥណ្ឌា  បានមើលឃើញកម្ពស់ទឹកខ្ពស់    ខណៈទឹកក្នុងទន្លេ Godavari ហក់ឡើងខ្លាំង បង្កការជន់លិចនៅក្នុងស្រុក Nanded បំផ្លាញផ្ទះសម្បែង និងបង្ខំឲ្យប្រជាពលរដ្ឋជម្លៀសចេញទៅកាន់តាមផ្លូវនានា។

មន្ត្រីម្នាក់មកពីមន្ទីរគ្រប់គ្រងគ្រោះមហន្តរាយបាននិយាយថា រដ្ឋបាលកំពុងតាមដានយ៉ាងដិតដល់នូវស្ថានភាព ដោយធានាការជម្លៀសប្រជាពលរដ្ឋចេញពីតំបន់ទំនាប និងសម្របសម្រួលប្រតិបត្តិការជួយសង្គ្រោះ។  

មនុស្សជាង ២៩០ នាក់ត្រូវបានជួយសង្គ្រោះពីភូមិដែលរងគ្រោះដោយទឹកជំនន់នៃស្រុក Nanded របស់រដ្ឋមហារាស្ត្រ(Maharashtra) ហើយកងកម្លាំងឆ្លើយតបគ្រោះមហន្តរាយរបស់រដ្ឋ និងកងទ័ពត្រូវបានដាក់ពង្រាយនៅក្នុងតំបន់នោះ។

គួររម្លឹកថា កាលពីដើមខែសីហានេះ ទឹកជំនន់និងបំណាក់ដីនៅក្នងតំបន់ភ្នំហិម៉ាល័យរបស់ឥណ្ឌា បានសម្លាប់មនុស្សប្រមាណ៧០ នាក់ និងរាប់សិបនាក់បាត់ខ្លួន៕