ការនាំចេញរ៉ែមេដែកកម្ររបស់ចិន បានស្ទុះងើបឡើងដល់កម្រិតខ្ពស់ ៦ខែនៅក្នុងខែកក្កដា កន្លងទៅនេះ ដោយបង្ហាញថា លំហូរពាណិជ្ជកម្មនៃប្រភេទរ៉ែដ៏សំខាន់ចំពោះរថយន្តអគ្គិសនី បានវិលមករកកម្រិតដែលធ្លាប់មើលឃើញពីមុនវិញ នៅមុនពេលទីក្រុងប៉េកាំង ដាក់ការទប់ស្កាត់នាំចេញ។

ទិន្នន័យពីអគ្គនាយកដ្ឋានគយចិន បានបង្ហាញនៅថ្ងៃពុធ (២០ សីហា) នេះថា ការនាំចេញពីប្រទេសផ្គត់ផ្គង់មេដែកកម្រដ៏ធំបំផុតរបស់ពិភពលោកមួយនេះ បានហក់ឡើងជិត ៧៥% ចាប់ពីខែមិថុនា ទៅដល់កម្រិតខ្ពស់បំផុតក្នុងរយៈពេលត្រឹមមួយខែបែបនេះ ចាប់តាំងពីខែមករាមក ក្នុងតួលេខ ៥.៥៧៧តោន កាលពីខែកក្កដា។

បរិមាណនាំចេញខែកក្កដា ដែលស្របតាមការរំពឹងទុករបស់អ្នកវិភាគនេះ ក៏មានកំណើន ៥,៧% ខ្ពស់ជាងការនាំចេញចំនួន ៥.២៧៨តោន ក្នុងខែដូចគ្នាកាលពីឆ្នាំមុន។ ការបន្តស្ទុះងើបឡើងវិញនៃលំហូរនាំចេញនេះ បានកើតឡើងបន្ទាប់ពីទីក្រុងប៉េកាំង បានយល់ព្រមលើកិច្ចព្រមព្រៀងជាបន្តបន្ទាប់ជាមួយសហរដ្ឋអាមេរិក និងអឺរ៉ុប ដើម្បីបង្កើនការនាំចេញ និងបន្ធូរបន្ថយការគ្រប់គ្រងផ្នែកនាំចេញ ដែលបានដាក់កាលពីខែមេសា ក្នុងការសងសឹកចំពោះពន្ធគយរបស់សហរដ្ឋអាមេរិក។

គិតតាមប្រទេស អាល្លឺម៉ង់នៅតែជាគោលដៅនាំចេញលេខ១ របស់ចិន ដែលមានបរិមាណ ១.១១៦តោន នៅខែកក្កដា ជាការកើនឡើង ៤៦% ធៀបនឹងខែមិថុនា។ ការនាំចេញក្រៅប្រទេសទៅកាន់សហរដ្ឋអាមេរិក កាលពីខែមុន ក៏បានកើនឡើង ៧៥,៥% ផងដែរពីខែមិថុនា ដល់តួលេខ ៦១៩តោន ពោលគឺខ្ពស់ជាងខែដូចគ្នាក្នុងឆ្នាំ២០២៤ ក្នុងអត្រា ៤,៨%៕