យោងតាមការប៉ាន់ស្មានដែលចេញផ្សាយនៅថ្ងៃអង្គារ (១៩ សីហា) ដោយវិទ្យាស្ថានសុខភាព Carlos III បានបង្ហាញថា ការស្លាប់ជាង ១.១០០នាក់ នៅអេស្ប៉ាញ ត្រូវបានផ្សារភ្ជាប់ទៅនឹងរលកកម្ដៅដ៏គ្រោះថ្នាក់ រយៈពេល ១៦ថ្ងៃ ដែលបានបញ្ចប់នៅថ្ងៃទី១៨ ខែសីហា ខណៈចំហេះព្រៃដ៏សន្ធោសន្ធៅជាច្រើនថ្ងៃនៅទូទាំងប្រទេស នៅតែបន្តមិនអាចគ្រប់គ្រងបាន។

ទីភ្នាក់ងារសុខភាពសាធារណៈមួយនេះនិយាយថា ក្រុមមន្ត្រីបានរាយការណ៍ថាមានអ្នកស្លាប់ដ៏ច្រើនចំនួន ១.១៤៩នាក់ នៅអេស្ប៉ាញ ចាប់ពីថ្ងៃទី៣ ដល់ថ្ងៃទី១៨ ខែសីហា ដែលអាចបណ្តាលមកពីសីតុណ្ហភាពក្តៅខ្លាំងពេក។

វិទ្យាស្ថាននេះប្រើប្រាស់ទិន្នន័យពីប្រព័ន្ធតាមដានការស្លាប់របស់អេស្ប៉ាញ ហៅកាត់ថា MoMo ដែលត្រូវបានប្រៀបធៀបទៅនឹងនិន្នាការប្រវត្តិសាស្ត្រ។ ទោះបីជាប្រព័ន្ធ MoMo នេះមិនអាចបញ្ជាក់ពីមូលហេតុដោយផ្ទាល់រវាងការស្លាប់ ទៅនិងសីតុណ្ហភាពខ្ពស់ក៏ដោយ ក៏ប្រព័ន្ធនេះបានផ្តល់នូវការប៉ាន់ប្រមាណដែលអាចទុកចិត្តបានបំផុតដែលថាកម្ដៅទំនងជាកត្តាដ៏ធំមួយទាក់ទងនឹងការស្លាប់បែបនេះ។

សម្រាប់ខែកក្កដា វិទ្យាស្ថាន Carlos III នេះបានសន្មតថា មានអ្នកស្លាប់យ៉ាងច្រើនចំនួន ១.០៦០នាក់ ដោយសារតែកម្ដៅដ៏ខ្លាំងក្លា ដែលកើនឡើង ៥៧% ធៀបនឹងរយៈពេលដូចគ្នាក្នុងឆ្នាំ២០២៤។ ក្រុមអ្នកជំនាញអាកាសធាតុបានព្រមានថា ការឡើងកម្ដៅផែនដី កំពុងជំរុញឱ្យមានរលកកម្ដៅកាន់តែយូរ កាន់តែខ្លាំងក្លា និងកាន់តែញឹកញាប់ឡើងនៅជុំវិញពិភពលោក៕