រដ្ឋមន្ត្រីក្រសួងរតនាគារ លោក Scott Bessent បានបង្ហាញថា សហរដ្ឋអាមេរិកពេញចិត្ត ចំពោះរបៀបរៀបចំពន្ធគយបច្ចុប្បន្ន ជាមួយប្រទេសចិន ជាសញ្ញាមួយដែលរដ្ឋបាលរបស់ប្រធានាធិបតីលោក Donald Trump កំពុងពិចារណាបន្តរក្សាទំនាក់ទំនងឲ្យស្ងប់ស្ងាត់បែបនេះ មុនពេលកិច្ចព្រមព្រៀងផ្អាកជម្លោះពាណិជ្ជកម្ម ផុតកំណត់នៅក្នុងខែវិច្ឆិកា។

ក្នុងអំឡុងពេលផ្ដល់បទសម្ភាសន៍ជាមួយប្រព័ន្ធផ្សព្វផ្សាយ Fox News នៅពេលដែលត្រូវបានសួរថា តើនៅពេលណាវឌ្ឍនភាព ក្នុងការចរចា នឹងត្រូវបានឃើញ ហើយថា តើសហរដ្ឋអាមេរិកត្រូវការកិច្ចព្រមព្រៀងពាណិជ្ជកម្ម ដោយសាររបៀបដែលវិធានការពន្ធកំពុងដំណើរការដែរ ឬទេ លោក Bessent បានឆ្លើយតបថា «យើងរីករាយណាស់» ជាមួយនឹងស្ថានភាពពន្ធគយជាមួយប្រទេសចិន។ លោកបាននិយាយថា៖ «ខ្ញុំគិតថា ឥឡូវនេះ ស្ថានភាពបច្ចុប្បន្ន ដំណើរការទៅល្អគួរសម»។

នៅក្នុងបទសម្ភាសន៍កាលពីថ្ងៃអង្គារ (ទី១៩ ខែសីហា) នោះ លោក Bessent បានបញ្ជាក់ថា៖ «ប្រទេសចិន គឺជាបន្ទាត់ប្រាក់ចំណូលធំបំផុតជាងគេ នៅក្នុងប្រាក់ចំណូលពន្ធ។ ដូច្នេះប្រសិនបើវាមិនមានការខូចខាតអ្វីទេ កុំជួសជុលវាអី។ យើងមាននូវការពិភាក្សាយ៉ាងល្អប្រសើរជាមួយប្រទេសចិន។ ខ្ញុំយល់ថា យើងនឹងឃើញការជជែកគ្នាម្ដងទៀត នៅមុនខែវិច្ឆិកា»។

ការលើកឡើងរបស់លោក Bessent នេះ បង្ហាញថា ការបន្ធូរបន្ថយភាពតានតឹង រវាងភាគីទាំង២ នៅតែមានដដែល ដែលអាចបើកឱកាសឲ្យមានជំនួបកំពូល រវាងលោក Trump និងមេដឹកនាំចិន លោក Xi Jinping។

រដ្ឋបាលរបស់លោក Trump ជាទូទៅ បានព្យាយមសម្រាលសំឡេងប្រឈមមុខដាក់គ្នា ជាមួយទីក្រុងប៉េកាំង នាពេលថ្មីៗនេះ ដើម្បីទទួលបានជំនួបកំពូលជាមួយលោក Xi និងកិច្ចព្រមព្រៀងពាណិជ្ជកម្ម។ រដ្ឋមន្ត្រីការបរទេសអាមេរិក លោក Marco Rubio បាននិយាយថា ជំនួប រវាងមេដឹកនាំទាំង២ ទំនងជាកើតមាន ទោះបីមិនទាន់កំណត់កាលបរិច្ឆេទក៏ដោយ។ កាលពីសប្តាហ៍មុន លោក Trump បានពន្យាពេលការផ្អាកយកពន្ធខ្ពស់លើទំនិញរបស់ចិន សម្រាប់រយៈពេល ៩០ថ្ងៃទៀត ដល់ដើមខែវិច្ឆិកា ជាចំណាត់ការមួយដែលធ្វើឲ្យទំនាក់ទំនងពាណិជ្ជកម្មមានស្ថិរភាព រវាងប្រទេសដែលមានសេដ្ឋកិច្ចធំជាងគេទាំង២ របស់ពិភពលោក៕