នៅក្នុងរបាយការណ៍មួយ នាថ្ងៃពុធ (ទី២០ ខែសីហា) នេះ អង្គការឃ្លាំមើលសិទ្ធិមនុស្ស (HRW) បានឲ្យដឹងថា ក្រុមឧទ្ទាម M23 ដែលគាំទ្រដោយប្រទេសរ៉្វាន់ដា បានសម្លាប់មនុស្សយ៉ាងហោចណាស់ ១៤០នាក់ នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ កាលពីខែកក្កដា ដោយនេះជាការបង្ហាញថា អំពើហិង្សានៅតែកើនឡើង បើទោះបីជាកិច្ចចរចាសន្តិភាពគាំទ្រដោយសហរដ្ឋអាមេរិក និងកាតា កំពុងដំណើរការក៏ដោយ។

ក្រុមតស៊ូមតិបានផ្តល់ព័ត៌មានលម្អិតថ្មី អំពីការសម្លាប់ដែលត្រូវបានរាយការណ៍ដំបូងគេដោយសារព័ត៌មាន Reuters ក្នុងខែកក្កដា។ ក្រុមនោះបានឲ្យដឹងថា ការសម្លាប់សរុប នៅក្នុងដែនដី Rutshuru ក្នុងខែកក្កដា អាចលើសពី ៣០០នាក់ ដោយបានស៊ីទៅនឹងការរកឃើញស្រដៀងគ្នាដោយអង្គការសហប្រជាជាតិកាលពីខែមុន។

របាយការណ៍នេះរួមបញ្ចូលការសម្ភាសន៍ជាមួយជនស៊ីវិលដែល HRW បានបញ្ជាក់ថា បានរួចរស់ជីវិតពីការសម្លាប់នេះ ដោយបានរៀបរាប់លម្អិត អំពីរបៀបដែលការវាយប្រហារនានាបានកើតឡើង។ ស្ត្រីម្នាក់ដែលបានឃើញក្រុម M23 សម្លាប់ប្តីរបស់ខ្លួន ដោយកាំបិត បានរៀបរាប់ថា កំពុងដើរពេញមួយថ្ងៃទៅកាន់ទន្លេមួយជាមួយស្ត្រី និងកុមារប្រហែល ៧០នាក់។

យោងតាមរបាយការណ៍នោះ បានបន្ថែមថា បុរសម្នាក់ទៀតបាននិយាយថា រូបគេបានមើលឃើញក្រុមឧទ្ទាម M23 សម្លាប់ប្រពន្ធ និងកូន ៤នាក់របស់ខ្លួន ដែលមានអាយុចន្លោះពី ៩ខែ ទៅ ១០ឆ្នាំ ពីចម្ងាយ បន្ទាប់ពីមិនអាចត្រលប់ទៅជួយសង្គ្រោះពួកគេទាន់ពេលវេលា។

គួរបញ្ជាក់ថា របាយការណ៍នៃការសម្លាប់នេះបានកើតឡើងតែប៉ុន្មានសប្តាហ៍បន្ទាប់ពីមានកិច្ចព្រមព្រៀងបឋមដែលសម្របសម្រួលដោយសហរដ្ឋអាមេរិក កាលពីថ្ងៃទី២៧ ខែមិថុនា រវាងកុងហ្គោ និងរ៉្វាន់ដា ព្រមទាំងការចរចាសន្តិភាព ក្នុងប្រទេសកាតា រវាងកុងហ្គោ និងក្រុមឧទ្ទាម M23។ នៅមុននេះ ក្រុម M23 បដិសេធមិនមានចំណែករួមណាមួយឡើយ ក្នុងការសម្លាប់ទាំងនោះ។ ក្រុមនេះមិនបានឆ្លើយតបនឹងសំណើសុំធ្វើអត្ថាធិប្បាយ ជុំវិញរបាយការណ៍នេះទេ៕