អូស្ត្រាលីបានរិះគន់ធ្ងន់ៗបកទៅមេដឹកនាំអ៊ីស្រាអែល លោក Benjamin Netanyahu នៅថ្ងៃពុធ ទី ២០ ខែសីហា បន្ទាប់ពីលោកបាននិយាយថា នាយករដ្ឋមន្ត្រីរបស់ប្រទេសនេះខ្សោយ ដោយរដ្ឋមន្ត្រីជាន់ខ្ពស់ម្នាក់និយាយថា កម្លាំងមានច្រើន មិនមែនវាស់លើ «ចំនួនប្រជាជនប៉ុន្មាននាក់ដែលអ្នកអាចសម្លាប់បាន» នោះទេ។

អស់ជាច្រើនទស្សវត្សរ៍មកហើយ អូស្ត្រាលីបានចាត់ទុកខ្លួនឯងថា ជាមិត្តជិតស្និទ្ធរបស់អ៊ីស្រាអែល ប៉ុន្តែទំនាក់ទំនង បានធា្លក់ចុះភ្លាមៗ ចាប់តាំងពីទីក្រុងកង់បេរ៉ា បានប្រកាសកាលពីសប្តាហ៍មុនថា ខ្លួននឹងទទួលស្គាល់រដ្ឋប៉ាឡេស្ទីន។

ហើយលោក Netanyahu បានបង្កើនសង្រ្គាមពាក្យសម្តី កាលពីយប់ថ្ងៃទី១៩ ខែសីហា ដោយហៅសមភាគីអូស្ត្រាលី លោក Anthony Albanese ថា ជា «អ្នកនយោបាយទន់ខ្សោយដែលក្បត់អ៊ីស្រាអែល»។

រដ្ឋមន្ត្រីក្រសួងមហាផ្ទៃអូស្ត្រាលី លោក Tony Burke បាននិយាយនៅថ្ងៃទី២០ ខែសីហានេះថា វាជាសញ្ញាពីសម្ដីក្រេវក្រោធរបស់មេដឹកនាំដែលមិនសប្បាយចិត្ត។ លោក Burke បានប្រាប់ទូរទស្សន៍ជាតិ ABC ថា៖ «កម្លាំងមិនត្រូវបានវាស់ដោយការសម្លាប់មនុស្សបានប៉ុន្មាននាក់ ឬការធ្វើឲ្យកុមារប៉ុន្មាននាក់អត់ឃា្លននោះឡើយ»។

លោកបានបញ្ជាក់ថា៖ «អ្វីដែលយើងបានឃើញជាមួយនឹងសកម្មភាពមួយចំនួនដែលពួកគេកំពុងធ្វើ គឺការបន្តធ្វើឲ្យអ៊ីស្រាអែលដាច់ចេញពីពិភពលោក ហើយនោះក៏មិនជាផលប្រយោជន៍របស់ពួកគេដែរ»។

លោក Netanyahu មានការខឹងសម្បានៅពេលដែលអូស្ត្រាលីបានប្រកាសថា ខ្លួននឹងទទួលស្គាល់ភាពជារដ្ឋរបស់ប៉ាឡេស្ទីន នៅក្នុងខែកញ្ញា បន្ទាប់ពីមានការសន្យាស្រដៀងគ្នាពីប្រទេសបារាំង កាណាដា និងអង់គ្លេស៕