រដ្ឋមន្ត្រីការបរទេសអាមេរិក លោក Marco Rubio បាននិយាយថា សហរដ្ឋអាមេរិកលែងផ្គត់ផ្គង់សព្វាវុធដល់អ៊ុយក្រែនដោយផ្ទាល់ទៀតហើយ ដោយលក់ឲ្យពួកគេជំនួសវិញ នៅពេលដែលទទួលបានការទូទាត់ពីបណ្តាប្រទេសអឺរ៉ុប តាមរយៈអង្គការណាតូរួចរាល់។

លោកបានបញ្ជាក់នៅក្នុងបទសម្ភាសន៍ជាមួយសារព័ត៌មាន Fox News បន្ទាប់ពីកិច្ចប្រជុំរបស់ប្រធានាធិបតីអាមេរិក ដូណាល់ ត្រាំ ( Donald Trump) ជាមួយលោក វ្ល៉ឌីមី ហ្សេឡិនស្គី និងមេដឹកនាំអឺរ៉ុបថា៖«យើងលែងផ្តល់អាវុធដល់អ៊ុយក្រែនទៀតហើយ។ យើងលែងផ្តល់លុយដល់អ៊ុយក្រែនទៀតហើយ។ ឥឡូវនេះ យើងកំពុងលក់សព្វាវុធឲ្យពួកគេ ហើយបណ្តាប្រទេសនៅអឺរ៉ុប កំពុងចំណាយប្រាក់ទិញអាវុធទាំងនោះ តាមរយៈអង្គការណាតូ។

លោក ត្រាំ បានជួបប្រជុំជាមួយលោក ហ្សេឡិនស្គី និងមេដឹកនាំអឺរ៉ុបមួយចំនួនស្តីពីការដោះស្រាយជម្លោះអ៊ុយក្រែន នៅក្នុងសេតវិមាន កាលពីថ្ងៃចន្ទ។ កិច្ចពិភាក្សានេះ មានការចូលរួមពីប្រធានាធិបតីហ្វាំងឡង់ លោក Alexander Stubb ប្រធានាធិបតីបារាំង Emmanuel Macron នាយករដ្ឋមន្ត្រីអង់គ្លេស Keir Starmer អធិការបតីអាល្លឺម៉ង់លោក Friedrich Merz និងនាយករដ្ឋមន្ត្រីអ៊ីតាលីលោកស្រី Giorgia Meloni ព្រមទាំងប្រធានគណៈកម្មការអឺរ៉ុបលោក Ursula von der Leyen និងអគ្គលេខាធិការអង្គការណាតូលោក Mark Rutte ។

សេតវិមានបានធ្វើជាម្ចាស់ផ្ទះទទួលមេដឹកនាំកំពូលជាច្រើន ក្នុងពេលដំណាលគ្នាជាលើកដំបូង ក្នុងប្រវត្តិសាស្ត្រ។ នេះគឺសមាជិកក្រុមចូលរួមដែលមិនធ្លាប់មានពីមុនមកនេះ ដែលគូសបញ្ជាក់ពីសារៈសំខាន់នៃបញ្ហាដែលកំពុងពិភាក្សានោះ ក៏ត្រូវបានកត់សម្គាល់ ដោយប្រធានាធិបតីសហរដ្ឋអាមេរិកផងដែរ។