ប្រធានាធិបតីលីបង់ លោក Joseph Aoun កាលពីថ្ងៃអង្គារ បានស្នើមិនឲ្យបញ្ចប់អាណត្តិរបស់កងរក្សាសន្តិភាពរបស់អង្គការសហប្រជាជាតិ នៅភាគខាងត្បូងរបស់ប្រទេសនេះ បន្ទាប់ពីក្រុមប្រឹក្សាសន្តិសុខអង្គការសហប្រជាជាតិ បានចាប់ផ្តើមពិភាក្សាអំពីការបន្តបេសកកម្មរបស់ពួកគេ។

ការបន្តអាណត្តិប្រចាំឆ្នាំនៅឆ្នាំនេះ ធ្វើឡើងបន្ទាប់ពីអាជ្ញាធរលីបង់ ក្រោមសម្ពាធដ៏ធ្ងន់របស់សហរដ្ឋអាមេរិក បានប្តេជ្ញារំសាយអាវុធរបស់ក្រុមហេសបូឡា នៅចុងឆ្នាំ បន្ទាប់ពីកិច្ចព្រមព្រៀងបទឈប់បាញ់កាលពីខែវិច្ឆិកា ដែលបានព្យាយាមបញ្ឈប់អរិភាពជាងមួយឆ្នាំ រវាងក្រុមគាំទ្រដោយអ៊ីរ៉ង់ និងអ៊ីស្រាអែល។

តាមសេចក្តីរាយការណ៍ អ៊ីស្រាអែលនិងសហរដ្ឋអាមេរិក ដែលប្រើសិទ្ធិវេតូលើសេចក្តីសម្រេចរបស់ក្រុមប្រឹក្សាសន្តិសុខ បានជំទាស់នឹងការបន្តអាណត្តិនេះ។

លោក Aoun បានប្រាប់មេបញ្ជាការកងកម្លាំងលោក Diodato Abagnara ថា៖«កាលវិភាគណាមួយសម្រាប់អាណត្តិរបស់កងកម្លាំងបណ្តោះអាសន្នរបស់អង្គការសហប្រជាជាតិនៅក្នុងប្រទេសលីបង់ (UNIFIL) ដែលខុសពីតម្រូវការបច្ចុប្បន្ន នឹងជះឥទ្ធិពលអវិជ្ជមានដល់ស្ថានភាព នៅភាគខាងត្បូង ដែលនៅតែត្រូវបានកាន់កាប់ដោយអ៊ីស្រាអែល»។ នេះបើយោងតាមសេចក្តីថ្លែងការណ៍របស់ប្រធានាធិបតី។

កងកម្លាំងបណ្តោះអាសន្នរបស់អង្គការសហប្រជាជាតិនៅក្នុងប្រទេសលីបង់ ត្រូវបានដាក់ពង្រាយ តាំងពីឆ្នាំ ១៩៧៨ ដើម្បីបំបែកអ៊ីស្រាអែល និងលីបង់ ហើយមានបុគ្គលិកប្រហែល ១០.000នាក់ មកពីប្រទេសប្រហែល ៥០។