ការិយាល័យទីប្រឹក្សាពិសេស បានប្រកាសកាលពីថ្ងៃទី១៩ ខែសីហាថា អតីតរដ្ឋមន្ត្រីក្រសួងមហាផ្ទៃ និងសុវត្ថិភាព លោក Lee Sang-min ត្រូវបានចោទប្រកាន់ជាផ្លូវការពីបទឃុបឃិត ក្នុងអំឡុងពេលមានការដាក់ចេញច្បាប់អាជ្ញាសឹករយៈពេលខ្លីរបស់អតីតប្រធានាធិបតី លោក Yoon Suk Yeol។

លោក Lee ដែលត្រូវបានចាប់ខ្លួនតាំងពីថ្ងៃទី១ ខែសីហា គឺជាសមាជិកទី២ នៃគណៈរដ្ឋមន្ត្រីរបស់លោក Yoon ដែលប្រឈមនឹងការចោទប្រកាន់ទម្លាក់តំណែង ជុំវិញវិបត្តិច្បាប់អាជ្ញាសឹក កាលពីខែធ្នូ ឆ្នាំ២០២៤ បន្ទាប់ពីរដ្ឋមន្ត្រីការពារជាតិ លោក Kim Yong-hyun នាពេលនោះ។

លោក Lee ត្រូវបានចោទប្រកាន់ថា បានចូលរួមក្នុងអ្វីដែលរដ្ឋអាជ្ញាហៅថា ការប៉ុនប៉ងធ្វើកុបកម្ម ដោយបំពានសិទ្ធិអំណាចរបស់លោក ដើម្បីគាបសង្កត់ប្រព័ន្ធផ្សព្វផ្សាយ និងនិយាយកុហក នៅចំពោះមុខតុលាការធម្មនុញ្ញ។

ជំនួយការរបស់ការិយាល័យទីប្រឹក្សាពិសេស លោកស្រី Park Ji-young បាននិយាយនៅក្នុងសន្និសីទសារព័ត៌មានមួយថា៖ «ក្នុងនាមជាប្រមុខក្រសួងមហាផ្ទៃ លោក Lee បានចូលរួមកិច្ចខិតខំប្រឹងប្រែង ដើម្បីបំផ្លាញសណ្តាប់ធ្នាប់រដ្ឋធម្មនុញ្ញ»។

ជំនួការរូបនេះ បានបន្ថែមថា៖ «លោកបានបំពានសិទ្ធិអំណាចរបស់លោក ដោយបានណែនាំនគរបាល និងមន្ត្រីពន្លត់អគ្គិភ័យឲ្យកាត់ផ្តាច់ការផ្គត់ផ្គង់ទឹក និងអគ្គិសនីដល់ប្រព័ន្ធផ្សព្វផ្សាយមួយចំនួន។ បន្ទាប់មក លោកបានព្យាយាមលាក់បាំងការពាក់ព័ន្ធរបស់លោក តាមរយៈការផ្តល់សក្ខីកម្មមិនពិត ក្នុងអំឡុងពេលសវនាការចោទប្រកាន់ទម្លាក់តំណែងរបស់តុលាការធម្មនុញ្ញ»។

ចំណែកលោក Yoon ដែលត្រូវបានចោទប្រកាន់ទម្លាក់តំណែងដោយតុលាការកំពូល កាលពីថ្ងៃទី៤ ខែមេសា កំពុងស្ថិតក្នុងដំណើរការកាត់ក្តី ពីបទរំលោភអំណាច និងការប៉ុនប៉ងផ្តួលរំលំច្បាប់រដ្ឋធម្មនុញ្ញ៕