ក្រសួងការពារជាតិរុស្ស៊ី បានរាយការណ៍កាលពីថ្ងៃអង្គារថា កងទ័ពរុស្ស៊ី បានធ្វើការវាយប្រហារពេញមួយយប់ដោយអាវុធវាយប្រហារគោលដៅជាក់លាក់ និងយានដ្រូន ទៅលើរោងចក្រចម្រាញ់ប្រេង ដែលផ្គត់ផ្គង់ប្រេងដល់កងទ័ពអ៊ុយក្រែន នៅក្នុងតំបន់ Donbass។ 

ក្រសួងបាននិយាយនៅក្នុងសេចក្តីថ្លែងការណ៍មួយថា៖«កាលពីយប់ថ្ងៃអង្គារ កងកម្លាំងប្រដាប់អាវុធរុស្ស៊ីបានធ្វើការវាយប្រហារដោយអាវុធវាយប្រហារគោលដៅជាក់លាក់រយៈចម្ងាយឆ្ងាយ និងយានដ្រូនទៅលើរោងចក្រចម្រាញ់ប្រេងដែលផ្គត់ផ្គង់ប្រេងដល់កងទ័ពអ៊ុយក្រែន នៅក្នុងតំបន់ Donbass។ គោលដៅនៃការវាយប្រហារ ត្រូវបានសម្រេច។ គោលដៅដែលបានកំណត់ទាំងអស់ ត្រូវបានវាយប្រហារដោយជោគជ័យ» ។

យោងតាមទិន្នន័យចុងក្រោយស្តីពីប្រតិបត្តិការយោធាពិសេសនៅអ៊ុយក្រែនដែលចេញផ្សាយដោយក្រសួងការពារជាតិរុស្ស៊ី បានឲ្យដឹងថា កងទ័ពអ៊ុយក្រែន បានបាត់បង់ទាហានប្រហែល ១.៣៧០នាក់ នៅក្នុងការប្រយុទ្ធជាមួយកងកម្លាំងរុស្ស៊ី នៅក្នុងតំបន់ជួរមុខទាំងអស់ ក្នុងរយៈពេល ២៤ម៉ោង កន្លងមកនេះ។

តួលេខចុងក្រោយបង្ហាញថា កងទ័ពអ៊ុយក្រែន បានបាត់បង់ទាហានប្រហែល ១៦០នាក់ រថក្រោះមួយគ្រឿង និងរថពាសដែកចំនួន ៤គ្រឿង នៅក្នុងតំបន់ទទួលខុសត្រូវរបស់កងកម្លាំងប្រយុទ្ធនៅភាគខាងជើងរបស់រុស្ស៊ី កងទ័ពជាង ២៤០នាក់ និងរថពាសដែកដែលផលិតដោយលោកខាងលិចចំនួន ៧គ្រឿងនៅក្នុងតំបន់ទទួលខុសត្រូវរបស់កងកម្លាំងប្រយុទ្ធនៅភាគខាងលិច និងកងទ័ព ២៣៥នាក់ និងរថ      ពាសដែកប្រយុទ្ធមួយគ្រឿង នៅក្នុងតំបន់ទទួលខុសត្រូវរបស់កងកម្លាំងប្រយុទ្ធនៅភាគខាងត្បូង។