ទិន្នន័យផ្លូវការ បានបង្ហាញនៅថ្ងៃពុធ (ទី២០ ខែសីហា) នេះថា អតិផរណារបស់ចក្រភពអង់គ្លេស ក្នុងខែកក្កដា បានឡើងដល់កម្រិតខ្ពស់បំផុតជាលើកដំបូងក្នុងរយៈពេល ១៨ខែ ដោយបានឡើងដល់កម្រិត ៣,៨ភាគរយ ពោលគឺខ្ពស់ជាង ៣,៦ភាគរយ កាលពីខែមិថុនា។ 

បន្ថែមពីលើការកើនឡើងនៃអត្រាអតិផរណារួម ចាប់តាំងពីខែមករា ឆ្នាំ២០២៤ អតិផរណានៅក្នុងវិស័យសេវាកម្មរបស់ចក្រភពអង់គ្លេស ដែលត្រូវបានតាមមើលយ៉ាងដិតដល់ដោយធនាគារកណ្ដាលអង់គ្លេស (BoE) បានឡើងយ៉ាងលឿនពី ៤,៧ភាគរយ ដល់ ៥ភាគរយ កាលពីមួយខែមុន។ 

BoE បានរំពឹងថា អតិផរណារួមនឹងកើនឡើងដល់ ៣,៨ភាគរយ នៅក្នុងខែកក្កដា ដោយតម្លៃសេវាកម្មនានា កើនឡើង ៤,៩ភាគរយ។ សេដ្ឋវិទូដែលត្រូវបានស្ទង់មតិដោយសារព័ត៌មាន Reuters ភាគច្រើន រំពឹងទុកថា នឹងមានអត្រា ៣,៧ភាគរយ និង ៤,៨ភាគរយ រៀងគ្នា។ 

តម្លៃប្រាក់ផោនបានឡើងបន្តិច បន្ទាប់ពីទិន្នន័យត្រូវបានផ្សព្វផ្សាយ។ កំណើនប្រាក់ឈ្នួលក្នុងប្រទេសអង់គ្លេស បានធ្លាក់ចុះ ប៉ុន្តែអត្រាប្រហែល ៥ភាគារយ គឺខ្ពស់ពេកណាស់ ដែលមិនអាចឲ្យ BoE មានទំនុកចិត្ត ដែលថា អតិផរណាតម្លៃទំនិញប្រើប្រាស់ធា្លក់ចុះមកវិញយ៉ាងឆាប់រហ័សដល់ ២ភាគរយនោះឡើយ។ 

ជាងនេះទៅទៀត និយោជកលើកឡើងថា ការដំឡើងពន្ធលើពួកគេ ក្នុងខែមេសា និងការកើនឡើងយ៉ាងខ្លាំងនូវប្រាក់ឈ្នួលអប្បបរមា កំពុងជំរុញឲ្យពួកគេដំឡើងថ្លៃទំនិញ។ ទិន្នន័យនៅថ្ងៃពុធនេះ បានបង្ហាញថា កត្តារួមចំណែកដ៏ធំបំផុតដល់ការកើនឡើងអតិផរណា នៅក្នុងខែកក្កដា គឺការដឹកជញ្ជូន ជាពិសេសតម្លៃសំបុត្រយន្តហោះ៕