សម្តេច ប៉ាប ឡេអូ (Pope Leo) បានស្នើដល់គ្រិស្តបរិស័ទ និងអ្នកគោរពបូជាសាសនាដទៃទៀតឲ្យប្រារព្ធពិធីតមអាហារ និងបួងសួងសុំឲ្យមានសន្តិភាពនៅក្នុងប្រទេសអ៊ុយក្រែន និងបណ្ដាប្រទេសដែលត្រូវបានហែកហួរដោយសង្រ្គាម នៅថ្ងៃសុក្រ ទី២២ ខែសីហា។

សម្ដេចសង្ឃកាតូលិក ឡេអូ បានមានបន្ទូលថា៖ «នៅពេលដែលផែនដីរបស់យើង បន្តរងគ្រោះដោយសង្រ្គាម នៅក្នុងដែនដីដ៏បរិសុទ្ធ ពោលគឺនៅក្នុងប្រទេសអ៊ុយក្រែន និងក្នុងតំបន់ជាច្រើនទៀត ខ្ញុំសូមអញ្ជើញអ្នកដ៏ស្មោះត្រង់ទាំងអស់ ប្រារព្ធពិធីតមអាហារ និងការអធិដ្ឋានមួយថ្ងៃ នៅថ្ងៃទី២២ ខែសីហា»។

សម្ដេច Leo បានមានបន្ទូលបន្ថែមថា៖ «អ្នកគោរពបូជាដ៏ស្មោះត្រង់ទាំងអស់ អាចសុំពរជ័យពីព្រះអម្ចាស់ឲ្យប្រទានសន្តិភាព និងយុត្តិធម៌ដល់យើង ហើយលាងទឹកភ្នែកអ្នកដែលរងទុក្ខវេទនាដោយសារជម្លោះប្រដាប់អាវុធដែលកំពុងតែបន្តមាន»។

សម្ដេច Leo ដែលជាសម្តេច ប៉ាប ជនជាតិធអាមេរិកទី១ ត្រូវបានបោះឆ្នោតជ្រើសរើស កាលពីថ្ងៃទី៨ ខែឧសភា ឲ្យបន្តតំណែងពីព្រះសពសម្តេច ប៉ាប ហ្វ្រង់ស៊ីស។ ព្រះអង្គបានអំពាវនាវម្តងហើយម្តងទៀតឲ្យបញ្ចប់សង្រ្គាម នៅអ៊ុយក្រែន ដោយការជួបមេដឹកនាំបរទេសជាលើកដំបូងរបស់ព្រះអង្គ គឺការជែកតាមទូរសព្ទជាមួយលោកប្រធានាធិបតីអ៊ុយក្រែន Volodymyr Zelenskyy ក្នុងខែឧសភា និងជួបដោយផ្ទាល់ នៅខែកក្កដា។

សម្តេច ប៉ាប ហ្វ្រង់ស៊ីស ក៏ធ្លាប់បានអំពាវានាវឲ្យមានតមអាហារ និងការអធិដ្ឋានមួយថ្ងៃ កាលពីខែតុលាឆ្នាំមុន ក្នុងខួបមួយឆ្នាំនៃសង្រ្គាម រវាងអ៊ីស្រាអែល និងក្រុមហាម៉ាស៕