ប្រធានាធិបតីរុស្ស៊ី លោក Vladimir Putin និងនាយករដ្ឋមន្ត្រីឥណ្ឌា លោក Narendra Modi នឹងមានជំនួបកំពូល នៅទីក្រុងញូវដេលី (ដេលី) នាចុងឆ្នាំនេះ ប៉ុន្តែកាលបរិច្ឆេទមិនទាន់មានជាផ្លូវការនៅឡើយទេ។ នេះបើតាមមន្ត្រីស្ថានទូតរុស្ស៊ីប្រចាំនៅប្រទេសឥណ្ឌា ដែលបានប្រាប់ទីភ្នាក់ងារសារព័ត៌មាន Reuters នាថ្ងៃពុធ (ទី២០ ខែសីហា) នេះ។

កិច្ចប្រជុំដែលមានការទន្ទឹងរង់ចាំយ៉ាងខ្លាំង កើតមានក្នុងពេលវេលាដ៏សំខាន់ សម្រាប់ប្រទេសទាំង២។ ក្នុងពេលដែលភាពតានតឹងផ្នែកភូមិសាស្ត្រនយោបាយកើនឡើងជាសកល ជាពិសេសង្គ្រាមនៅអ៊ុយក្រែន និងគោលនយបាយផ្លាស់ប្តូរសម្ព័ន្ធភាព ការពិភាក្សា រវាងមេដឹកនាំទាំង២ ត្រូវបានគេរំពឹងថា នឹងគ្របដណ្តប់លើបញ្ហាជាច្រើន ដែលទំនងជារួមមានពាណិជ្ជកម្ម កិច្ចសហប្រតិបត្តិការការពារជាតិ និងថាមពល។

ក្នុងរយៈពេលប៉ុន្មានខែថ្មីៗនេះ ឥណ្ឌាបានបន្តរក្សាតុល្យភាពដ៏ផុយស្រួយ ក្នុងគោលនយោបាយការបរទេសរបស់ខ្លួន ដោយប្រឹងប្រែងថ្លឹងថ្លែងយ៉ាងប្រយ័ត្នប្រយែងនូវទំនាក់ទំនងរបស់ខ្លួនជាមួយមហាអំណាច ដូចជាសហរដ្ឋអាមេរិក និងរុស្ស៊ី។ កិច្ចពិភាក្សានាពេលខាងមុខ ទំនងជាពង្រឹងទំនាក់ទំនងដ៏យូរអង្វែង រវាងឥណ្ឌា និងរុស្ស៊ី ដែលត្រូវបានកំណត់លក្ខណៈជាប្រវត្តិសាស្ត្រដោយភាពជាដៃគូយុទ្ធសាស្ត្រ ក្នុងវិស័យការពារជាតិ និងបច្ចេកវិទ្យា។

គួរកត់សម្គាល់ថា ប្រទេសឥណ្ឌា គឺជាអ្នកទិញគ្រឿងយុទ្ធោបករណ៍រុស្ស៊ីដ៏ធំ ហើយកិច្ចប្រជុំនេះ អាចបើកផ្លូវឲ្យមានកិច្ចសហប្រតិបត្តិការបន្ថែមទៀត នៅក្នុងវិស័យនេះ៕