បាត់ដំបង៖ សហភាពសហព័ន្ធយុវជនកម្ពុជាខេត្តបាត់ដំបង សហការជាមួយរដ្ឋបាលខេត្តបាត់ដំបង នៅថ្ងៃទី១៩ ខែមករា ឆ្នាំ២០២២ បានរៀបចំព្រឹត្តការណ៍បាត់ដំបងម៉ារ៉ាតុង សប្បុរសធម៌ ឆ្នាំ២០២២។កម្មវិធីនេះ បង្កើតឡើងក្នុងគោលបំណងស្វែងរកមូលនិធិជួយដល់កុមារកំព្រាក្នុងខេត្តបាត់ដំបង និងដើម្បីលើកស្ទួយវិស័យកីឡា ក្នុងខេត្ត ក៏ដូចជាលើកចិត្តទឹកចិត្តចំពោះយុវជន យុវនារី​ចូលរួមលេងកីឡា ចៀសផុតពីគ្រឿងញៀន​ល្បែងអបាយមុខ នាំមកនូវសុខភាព មិត្តភាព និងសាមគ្គីភាពផង។

ពិធីនេះ ធ្វើឡើងក្រោមអធិបតីភាព ឯកឧត្តម ស សុខា អនុប្រធានសហភាពសហព័ន្ធយុវជន​កម្ពុជា​ទទួលបន្ទុក៣ខេត្ត(បាត់ដំបង ព្រៃវែង និងបន្ទាយមានជ័យ) ព្រមទាំងបានការអញ្ជើញចូលរួម​ពី​ឯកឧត្តម លោកជំទាវ លោកឧកញ៉ា លោក លោកស្រីសមាជិកក្រុមប្រឹក្សាខេត្ត អភិបាលរងខេត្ត អភិបាលក្រុងបាត់ដំបង មន្ទីរ វិស័យពាក់ព័ន្ធជុំវិញខេត្ត អនុប្រធាន និងសមាជិក ស.ស.យ.ក.ខេត្ត ក្រុង/ស្រុកទាំង១៤ សិស្ស និស្សិត និងកីឡាករ កីឡាការិនី សរុបចំនួន១៤០០នាក់។

ជាលទ្ធផលចំណាត់ថ្នាក់លេខ១កីឡាករផ្នែកបុរស ​បានទៅកីឡាករ Miroshi Ake ជនជាតិជប៉ុន ចំណាត់ថ្នាក់លេខ២ Davey Calko ជនជាតិអង់គ្លេស និងចំណាត់ថ្នាក់លេខ៣ សុយ មាស សមាជិក ស.ស.យ.ក.ស្រុកភ្នំព្រឹក។

ចំណាត់ថ្នាក់កីឡាការនីផ្នែកនារី ចំណាត់លេខ១ បានទៅលើកីឡាការនី កញ្ញា. Agnes ជនជាតិដាណឺម៉ាក ចំណាត់ថ្នាក់លេខ២ កញ្ញា. ញ៉ ចំរ៉ុម មកពីអង្គការករុណាបាត់ដំបង ចំណាត់ថ្នាក់លេខ៣ កញ្ញា. រ៉ ធីតា មកពីវិទ្យាល័យព្រះមុនីវង្ស។

ក្នុងនោះជ័យលាភីចំណាត់ថ្នាក់លេខ១​ ទទួលបានពាន១ ​មេដាយមាស១ ទង់ជ័យលាភី១ និង​ប្រាក់ឧបត្ថម្ភ១លានរៀល ចំណាត់ថ្នាក់លេខ២ ​ទទួលបានមេដាយប្រាក់១ ទង់ជ័យលាភី១ និងប្រាក់​ឧបត្ថម្ភចំនួន៨០ម៉ឺនរៀល និង ចំណាត់ថ្នាក់លេខ៣​ ទទួលបានមេដាយសំរិទ្ធ១ ទង់ជ័យលាភី១ និងប្រាក់ឧបត្ថម្ភចំនួន៦០ម៉ឺនរៀល ​។

ដោយឡែកជ័យលាភីចំណាត់លេខ៤ដល់លេខ១០ ទទួលបានមេដាយសំរិទ្ធ១ បាច់ផ្កា១ និងប្រាក់​លើកទឹកចិត្តក្នុងម្នាក់​ ១០ម៉ឺនរៀល​ ព្រមទាំង​ឧបត្ថម្ភដល់កីឡាករ ​កីឡាការិនី ​ជនពិការសរុប៣០នាក់ ម្នាក់ៗ ​ទទួល​បានថវិកាឧបត្ថម្ភ ​៤ម៉ឺនរៀលផងដែរ៕