របបសឹកមីយ៉ាន់ម៉ា បាននិយាយកាលពីថ្ងៃពុធ (២០ សីហា) ថា កងទ័ពរបស់ខ្លួនវាយដណ្ដើមបានទីប្រជុំជនដ៏សំខាន់មួយនៅភាគខាងកើត បន្ទាប់ពីការប្រយុទ្ធគ្នាអស់រយៈពេល ១៦ថ្ងៃ ដោយបានដណ្តើមយកទឹកដីដែលប្រជែងដោយពួកឧទ្ទាម ខណៈការបោះឆ្នោតនៅខែធ្នូដ៏ចម្រូងចម្រាស ខិតកាន់តែកៀក។

ទីប្រជុំជននេះឈ្មោះ Demoso ដែលមានចម្ងាយ ១០៥គីឡូម៉ែត្រភាគខាងកើតនៃរដ្ឋធានីណៃពិដោរ បានមើលឃើញការប្រយុទ្ធគ្នាដ៏ខ្លាំងក្លា ចាប់តាំងពីការផ្តួលរំលំរដ្ឋាភិបាលប្រជាធិបតេយ្យនៅឆ្នាំ២០២១ ដោយយោធា បានបង្កឱ្យមានសង្រ្គាមស៊ីវិលមក។

របបសឹកដែលកំពុងរួមរឹតដោយជម្លោះ គ្រោងនឹងរៀបចំការបោះឆ្នោតនៅក្នុងតំបន់នានាដែលខ្លួនគ្រប់គ្រង ដោយចាប់ផ្តើមនៅថ្ងៃទី២៨ ខែធ្នូ ហើយបាននិងកំពុងប្រឹងប្រែងវាយលុកជាបន្តបន្ទាប់ដើម្បីពង្រីកទឹកដីកាន់កាប់បន្ថែមទៀត។

កាសែតមានទំនាក់ទំនងជាមួយរដ្ឋ ឈ្មោះ Global New Light of Myanmar បាននិយាយថា យោធាបានវាយយកទីប្រជុំជន Demoso - ដោយឡោមព័ទ្ធទីប្រជុំជននេះ និងតំបន់ជនបទជុំវិញនោះ - បន្ទាប់ពីសមរភូមិរយៈពេល ១៦ថ្ងៃ ដែលបានបញ្ចប់កាលពីថ្ងៃអង្គារ។ យ៉ាងណាមិញ អ្នកស្រុកម្នាក់និយាយថា នៅតែមានការបាញ់មីស៊ីល អាវុធធុនធ្ងន់ និងការវាយប្រហារតាមអាកាស ហើយបដិសេធថា យោធាមិនទាន់គ្រប់គ្រងទាំងស្រុងនៅក្នុងតំបន់នោះទេ៕