រុស្ស៊ី៖ ក្រុមមន្ត្រីបាននិយាយកាលពីថ្ងៃអង្គារថា ប្រទេសរុស្ស៊ីកំពុងបញ្ជូនកងទ័ពទៅកាន់ប្រទេសបេឡារុស សម្រាប់ហ្គេមសង្គ្រាមដ៏ធំមួយនៅក្នុងការដាក់ពង្រាយបន្ថែមទៀត ដែលបង្កើនកងយោធារបស់រុស្ស៊ីនៅជិតប្រទេសអ៊ុយក្រែន ក្នុងពេលមានការព្រួយបារម្ភពីប្រទេសលោកខាងលិចជុំវិញការឈ្លានពាន។
មន្ត្រីយោធាប្រទេសរុស្សី និងបេឡារុសបានធ្វើសន្និសីទកាលពីថ្ងៃអង្គារ សម្រាប់សេនានុព័ន្ធយោធាបរទេសស្តីពីសមយុទ្ធនាពេលខាងមុខ។ អនុរដ្ឋមន្ត្រីក្រសួងការពារជាតិរុស្ស៊ីលោក Alexander Fomin បាននិយាយថា សមយុទ្ធនេះមានគោលបំណងអនុវត្តការឆ្លើយតបរួមគ្នា ចំពោះការគំរាមកំហែងពីខាងក្រៅដោយសម្ព័ន្ធមិត្តរបស់ប្រទេសរុស្ស៊ី និងបេឡារុស ដែលមានទំនាក់ទំនងនយោបាយ សេដ្ឋកិច្ច និងយោធាជិតស្និទ្ធ។ លោក Fomin មិនបាននិយាយថា ចំនួនទាហាន និងសព្វាវុធប៉ុន្មាននឹងត្រូវដាក់ពង្រាយឡើងវិញ សម្រាប់សមយុទ្ធនេះដែលនឹងចូលរួមក្នុងហ្គេមសង្គ្រាមនោះទេ។ មន្ត្រីប្រទេសអ៊ុយក្រែនបានព្រមានថា ប្រទេសរុស្ស៊ីអាចបើកការវាយប្រហារពីគ្រប់គោលដៅ រួមទាំងពីទឹកដីនៃសម្ព័ន្ធមិត្តរបស់ខ្លួនគឺប្រទេសបេឡារុស។
ការដាក់ពង្រាយនេះនឹងជំរុញឲ្យមានទាហានប្រមាណ ១០ម៉ឺននាក់រួមជាមួយរថក្រោះ និងអាវុធធុនធ្ងន់ផ្សេងទៀតដែលបានប្រមូលផ្តុំនៅជិតប្រទេសអ៊ុយក្រែន ក្នុងអ្វីដែលប្រទេសលោកខាងលិចព្រួយបារម្ភថា អាចជាការឈានទៅរកការឈ្លានពាន។ រុស្ស៊ីបានបដិសេធពីបំណងវាយប្រហារអតីតប្រទេសជិតខាងរបស់សូវៀត ប៉ុន្តែទាមទារការធានាពីប្រទេសលោកខាងលិចថា អង្គការ NATO នឹងមិនពង្រីកខ្លួនទៅរកប្រទេសអ៊ុយក្រែន ឬប្រទេសអតីតសហភាពសូវៀតផ្សេងទៀត ឬដាក់កងទ័ព និងសព្វាវុធនៅទីនោះឡើយ។ ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនបានច្រានចោលយ៉ាងម៉ឺងម៉ាត់ នូវការទាមទាររបស់ទីក្រុងមូស្គូក្នុងអំឡុងការចរចាកាលពីសប្តាហ៍មុន រវាងប្រទេសរុស្ស៊ី-អាមេរិកនៅទីក្រុងហ្សឺណែវ និងកិច្ចប្រជុំអង្គការណាតូ-រុស្ស៊ីដែលពាក់ព័ន្ធនៅទីក្រុងព្រុចសែល៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
