អគ្គលេខាធិការអង្គការសហប្រជាជាតិលោក Antonio Guterres នៅថ្ងៃព្រហស្បតិ៍សប្ដាហ៍នេះ បានអំពាវនាវឱ្យមានបទឈប់បាញ់ភ្លាមៗ នៅក្នុងដែនដីហ្កាហ្សា បន្ទាប់ពីអ៊ីស្រាអែល បានប្រកាសជំហានដំបូងនៃប្រតិបត្តិការដើម្បីដណ្តើមកាន់កាប់ទីក្រុងហ្កាហ្សា។

លោក Guterres បាននិយាយនៅក្នុងប្រទេសជប៉ុនជាកន្លែងដែលលោកកំពុងចូលរួមសន្និសីទអន្តរជាតិតូក្យូស្តីពីការអភិវឌ្ឍន៍អាហ្វ្រិកថា ពិតជាចាំបាច់ខ្លាំងណាស់ក្នុងការឈានដល់បទឈប់បាញ់ភ្លាមៗនៅហ្កាហ្សា ដើម្បីជៀសវាងការស្លាប់ និងការបំផ្លិចបំផ្លាញ ដោយសារប្រតិបត្តិការយោធារបស់អ៊ីស្រាអែលដែលត្រូវតែធ្វើជៀសមិនរួច ប្រឆាំងនឹងទីក្រុងហ្កាហ្សា។

អ៊ីស្រាអែល ដែលបានហៅទាហានបម្រុងរាប់ម៉ឺននាក់ កំពុងបន្តឆ្ពោះទៅមុខជាមួយនឹងផែនការរបស់ខ្លួនក្នុងការដណ្តើមយកទីក្រុងដ៏ធំបំផុតរបស់ហ្កាហ្សា ទោះមានការរិះគន់ពីអន្តរជាតិចំពោះប្រតិបត្តិការដែលទំនងជាបង្ខំឱ្យមានការផ្លាស់ទីលំនៅរបស់ប្រជាជនប៉ាឡេស្ទីនជាច្រើននាក់ទៀតយ៉ាងណាក៏ដោយ។ បច្ចុប្បន្នអ៊ីស្រាអែលកាន់កាប់ប្រហែល ៧៥% នៃតំបន់ហ្កាហ្សាស្ទ្រីប។

គួររម្លឹកថា សង្គ្រាមនៅហ្កាហ្សាបានចាប់ផ្តើមកាលពីថ្ងៃទី៧ ខែតុលា ឆ្នាំ២០២៣ នៅពេលដែលក្រុមខ្មាន់កាំភ្លើងដឹកនាំដោយក្រុមហាម៉ាស បានវាយប្រហារសហគមន៍អ៊ីស្រាអែលភាគខាងត្បូងដោយបានសម្លាប់មនុស្សប្រហែល១.២០០នាក់ ភាគច្រើនជាជនស៊ីវិល និងចាប់មនុស្សជាចំណាប់ខ្មាំងចំនួន២៥១  នាក់រួមទាំងកុមារចូលទៅក្នុងហ្កាហ្សា ដែលរហូតមកដល់ពេលនេះនៅតែមានមនុស្សរាប់សិបនាក់ជាប់ឃុំក្នុងដៃក្រុមហាម៉ាសនេះ៕