និយោជិតយ៉ាងហោចណាស់៦០០នាក់នៃមជ្ឈមណ្ឌលគ្រប់គ្រងនិងបង្ការជំងឺឆ្លង (CDC) នៅសហរដ្ឋអាមេរិកកំពុងទទួលបានសេចក្តីជូនដំណឹងអំពីការបញ្ចប់ការងារជាអចិន្ត្រៃយ៍ បន្ទាប់ពីមានសេចក្តីសម្រេចរបស់តុលាការនាពេលថ្មីៗនេះ។

សេចក្តីជូនដំណឹង បានចេញផ្សាយក្នុងសប្តាហ៍នេះ ហើយមនុស្សជាច្រើននៅមិនទាន់បានទទួលព័ត៌មាននេះនៅឡើយ នេះបើយោងតាមសហព័ន្ធបុគ្គលិករដ្ឋាភិបាលអាមេរិក (AFGE) ដែលតំណាងឱ្យសមាជិកជាង ២.០០០នាក់ទទួលប្រាក់ខែនៅមជ្ឈមណ្ឌលគ្រប់គ្រងនិងបង្ការជំងឺឆ្លង (CDC)។

មជ្ឈមណ្ឌលគ្រប់គ្រងនិងបង្ការជំងឺឆ្លង (CDC) បានដើរតួនាទីយ៉ាងសំខាន់ក្នុងការប្រមូលទិន្នន័យ និងកំណត់គោលនយោបាយសុខភាពអំឡុងពេលជំងឺរាតត្បាត COVID-19។ ការបញ្ចប់ការងារនេះ ធ្វើឡើងប៉ុន្មានខែបន្ទាប់ពីរដ្ឋមន្ត្រីក្រសួងសុខាភិបាលនិងប្រជាសេវា(HHS) លោក Robert F Kennedy Jr បានប្រកាសពីកិច្ចខិតខំប្រឹងប្រែងដើម្បីកាត់រំសាយបុគ្គលិកចំនួន២០.០០០នាក់ ជាការកាត់បន្ថយជាង២០ភាគរយធ្វើឡើងដោយក្រសួង ។

មន្ត្រីសហព័ន្ធបុគ្គលិករដ្ឋាភិបាលអាមេរិក(AFGE) បាននិយាយថា ពួកគេដឹងថាបុគ្គលិកយ៉ាងហោចណាស់៦០០នាក់ត្រូវបានកាត់បន្ថយ។

ការកាត់បុគ្គលិកជាអចិន្ត្រៃយ៍រួមមានបុគ្គលិកប្រហែល១០០នាក់ដែលធ្វើការក្នុងការទប់ស្កាត់អំពើហិង្សា។ បុគ្គលិកមួយចំនួនបាននិយាយថាការកាត់រំសាយទាំងនេះបានកើតឡើងមិនដល់ពីរសប្តាហ៍នោះទេបន្ទាប់ពីបុរសម្នាក់បានបាញ់រះយ៉ាងហោចណាស់១៨០គ្រាប់ចូលទៅក្នុងបរិវេណមជ្ឈមណ្ឌលCDC ហើយបានសម្លាប់មន្ត្រីនគរបាលម្នាក់។