ក្រុមផ្តល់ជំនួយអន្តរជាតិនិយាយថា ពួកគេមិនទាន់អាចដឹកជញ្ជូនសម្ភារៈទីជម្រកចូលទៅដល់តំបន់ហ្កាហ្សាបាននៅឡើយ ទោះបីជាអាជ្ញាធរអ៊ីស្រាអែលនិយាយថាពួកគេបានដកការរឹតត្បិតលើការផ្គត់ផ្គង់បែបនេះក៏ដោយ និងបានព្រមានថាការពន្យារពេលបន្ថែមទៀតអាចបណ្តាលឱ្យពលរដ្ឋប៉ាឡេស្ទីនស្លាប់កាន់តែច្រើនបន្ថែមទៀត។

អង្គការផ្តល់ជំនួយបាននិយាយថា អ៊ីស្រាអែលបានដាក់ចូលជាធរមានការរារាំងការដឹកជញ្ជូនសម្ភារៈសម្រាប់ទីជម្រករយៈពេលជិត៦ខែមកហើយ ដោយបង្គោលដំឡើងតង់កាលពីពេលមុនត្រូវបានចុះបញ្ជីក្នុងចំណោមវត្ថុដែលអាជ្ញាធរអ៊ីស្រាអែលចាត់ទុកថាអាចជាការប្រើប្រាស់សម្រាប់ទាំងយោធានិងស៊ីវិល។

ដោយមានការព្រួយបារម្ភជាអន្តរជាតិជុំវិញស្ថានភាពរបស់ពលរដ្ឋប៉ាឡេស្ទីនដែលកំពុងកើនឡើងខណៈសង្រ្គាមនៅហ្កាហ្សានៅតែបន្ត អ៊ីស្រាអែលបានប្រកាសវិធានការកាលពីខែមុនដើម្បីអនុញ្ញាតឱ្យមានជំនួយបន្ថែមទៀតចូលទៅក្នុងតំបន់ហ្កាហ្សា និងបាននិយាយថា ខ្លួននឹងចាប់ផ្តើមអនុញ្ញាតឱ្យសម្ភារៈសម្រាប់សង់ទីជម្រកចូលទៅ។

ប៉ុន្តែមន្ត្រីមកពីក្រុមផ្តល់ជំនួយចំនួនប្រាំ រួមមានទាំងទីភ្នាក់ងាររបស់អង្គការសហប្រជាជាតិ បានប្រាប់សារព័ត៌មានរ៉យទ័រថា សម្ភារៈទីជម្រកដែលជនភៀសខ្លួនប៉ាឡេស្ទីនត្រូវការនៅតែមិនទាន់បានដល់តំបន់ហ្កាហ្សានៅឡើយ។ អ្នកនាំពាក្យការិយាល័យសម្របសម្រួលកិច្ចការមនុស្សធម៌ (OCHA) នៃអង្គការសហប្រជាជាតិ លោក Jens Laerke បាននិយាយថា «អង្គការសហប្រជាជាតិ និងដៃគូរបស់យើង នៅតែមិនទាន់អាចនាំយកសម្ភារៈទីជម្រកចូលទៅបាននៅឡើយ បន្ទាប់ពីមានការប្រកាសរបស់អ៊ីស្រាអែល»។