រដូវមូសុងដ៏កាចសាហាវក្នុងឆ្នាំ២០២៥នេះ បានឆក់យកជីវិតមនុស្សយ៉ាងហោចណាស់ ១.៨៦០នាក់ នៅក្នុងប្រទេសឥណ្ឌា និងប៉ាគីស្ថាន ជាមួយនឹងទឹកជំនន់យ៉ាងគំហុក បំណាក់ដី និងបង្កការជន់លិចទីក្រុង ដែលបង្ហាញពីកំណើនភាពងាយរងគ្រោះបំផុតក្នុងតំបន់ ទៅនឹងគ្រោះមហន្តរាយទាក់ទងនឹងអាកាសធាតុបែបនេះ។

ឥណ្ឌា បានរាយការណ៍ថាមានអ្នកស្លាប់ចំនួន ១.១០៩នាក់ ចាប់តាំងពីចុងខែឧសភាមក ខណៈមនុស្ស ៧៥៩នាក់ បានស្លាប់នៅប៉ាគីស្ថាន ចាប់តាំងពីថ្ងៃទី២៦ ខែមិថុនា នេះបើយោងតាមតួលេខផ្លូវការពីប្រទេសជិតខាងទាំងពីរ។ ជនរងគ្រោះជាច្រើននាក់បានលង់ទឹកស្លាប់ ចំណែកអ្នកផ្សេងទៀតបានស្លាប់ដោយសារបំណាក់ដីគ្របសង្កត់ ឬដួលរលំផ្ទះសម្បែង។

នៅឥណ្ឌា គ្រោះថ្នាក់លង់ទឹកស្លាប់មានចំនួន ៤៨៤នាក់ និងអ្នកស្លាប់ពីទឹកជំនន់ ១១៦នាក់ នេះបើយោងតាមទិន្នន័យ ខណៈផ្ទះសម្បែងចំនួន ៥ម៉ឺនខ្នង ត្រូវបានខូចខាត ដែលប៉ះពាល់ដល់មនុស្សរាប់សែននាក់។ ដោយរដូវខ្យល់មូសុងនៅតែសល់ប៉ុន្មានសប្ដាហ៍ទៀត ចំនួនអ្នកស្លាប់អាចកើនឡើងកាន់តែច្រើនពីប្រទេសទាំងពីរ។

បម្រែបម្រួលអាកាសធាតុកំពុងបង្កើនឥទ្ធិពលយ៉ាងកម្រោលរបស់ខ្យល់មូសុងនៅអាស៊ីខាងត្បូង ខណៈបាតុភូតតាមរដូវកាលមួយនេះ ជាធម្មតាតែងនាំភាពធូរស្រាលដល់កសិករ ប៉ុន្តែពេលនេះកាន់តែមានផលវិបាកធ្ងន់ធ្ងរ។ កំណើនសីតុណ្ហភាពសកល ក៏កំពុងបង្កើនភាពញឹកញាប់ និងកម្លាំងនៃព្រឹត្តិការណ៍អាកាសធាតុធ្ងន់ធ្ងរផងដែរ ដូចជាទឹកជំនន់ គ្រោះរាំងស្ងួត ព្យុះស៊ីក្លូន និងរលកកម្ដៅជាដើម៕