អាជ្ញាធរស៊ីរី បាននិយាយកាលពីថ្ងៃពុធថា ជំនួយមនុស្សធម៌ទាំងអស់ ត្រូវតែចូលប្រទេសនេះ តាមរយៈ បណ្តាញ ដែលអនុម័តដោយទីក្រុងដាម៉ាស ដោយបដិសេធការអំពាវនាវឲ្យបង្កើតច្រករបៀងឆ្លងព្រំដែនជំនួស ជាពិសេសនៅក្នុងខេត្ត Sweida ភាគខាងត្បូង។

មន្ត្រីមិនបញ្ចេញឈ្មោះម្នាក់ ដែលដកស្រង់សម្តីដោយទីភ្នាក់ងារសារព័ត៌មានរដ្ឋ SANA បាននិយាយថា ការដឹកជញ្ជូនជំនួយនទាំងអស់ ត្រូវតែមានការសម្របសម្រួលដោយផ្ទាល់ជាមួយទីក្រុងដាម៉ាស ដើម្បីធានាថា ពួកគេ «មានសុវត្ថិភាព និងរៀបចំយ៉ាងត្រឹមត្រូវ»។ មន្ត្រីរូបនេះ បាននិយាយថា អាជ្ញាធរស៊ីរី បានផ្តល់ការយល់ព្រមជាចាំបាច់ ដល់ទីភ្នាក់ងារអង្គការសហប្រជាជាតិ ហើយថា ក្បួនរថយន្តសង្គ្រោះស៊ីរីនៅតែបន្តប្រតិបត្តិការជាប្រចាំ។

សេចក្តីថ្លែងការណ៍នេះ គឺស្មើនឹងការបដិសេធសំណើរបស់ខេត្តSweida ដើម្បីបើកច្រកជំនួយឆ្លងកាត់ប្រទេសហ្ស៊កដានី ឬអ៊ីស្រាអែល។ របាយការណ៍របស់សារព័ត៌មាន SANA បាននិយាយថា គោលនយោបាយនេះ ត្រូវបានអនុវត្តទូទាំងប្រទេស។

ការប្រកាសនេះ បានធ្វើឡើង ចំពេលដែលភាពចលាចលកាន់តែខ្លាំងឡើង នៅក្នុងទីក្រុង Sweida ជាកន្លែងដែលក្រុមប្រដាប់អាវុធជនជាតិភាគតិច Druze បានប៉ះទង្គិច ជាមួយក្រុមប្រឆាំងដែលដឹកនាំដោយក្រុមកាន់និកាយស៊ុននី និងកងកម្លាំងរដ្ឋាភិបាល។ កន្លងមក អ៊ីស្រាអែល បានផ្តល់ជំនួយផ្នែកវេជ្ជសាស្រ្តនៅក្នុងតំបន់នេះ ដោយបានធ្វើជម្លោះជុំវិញលទ្ធភាពទទួលបានជំនួយកាន់តែស្មុកស្មាញ។