ក្រុមហាម៉ាសប៉ាឡេស្ទីនដែលមានមូលដ្ឋាននៅតំបន់ហ្កាហ្សា បានអំពាវនាវឲ្យក្រុមអ្នកសម្រុះសម្រួល ដាក់សម្ពាធអតិបរមាលើថ្នាក់ដឹកនាំរបស់អ៊ីស្រាអែល ស្របពេលចាប់ផ្តើមប្រតិបត្តិការយោធា ដើម្បីគ្រប់គ្រងមជ្ឈមណ្ឌលរដ្ឋបាលនៃតំបន់ហ្កាហ្សាស្ទ្រីប។

ចលនានេះ បាននិយាយនៅក្នុងសេចក្តីថ្លែងការណ៍មួយនៅលើបណ្តាញ Telegram របស់ខ្លួនថា៖«យើងកំពុងជំរុញឲ្យក្រុមអ្នកសម្រុះសម្រួល ដាក់សម្ពាធអតិបរមាលើអ៊ីស្រាអែល ដើម្បីបង្ខំឲ្យប្រទេសនេះ បញ្ឈប់សង្រ្គាមដែលបំផ្លិចបំផ្លាញប្រជាជនប៉ាឡេស្ទីន»។ ក្រុមហាម៉ាស បានសង្កត់ធ្ងន់ថា ការសម្រេចចិត្តរបស់ថ្នាក់ដឹកនាំអ៊ីស្រាអែល «ច្រានចោលរាល់កិច្ចខិតខំប្រឹងប្រែងដែលបានអនុវត្តដោយក្រុមអន្តរការី» នៅក្នុងក្របខ័ណ្ឌនៃកិច្ចពិភាក្សាស្តីពីបទឈប់បាញ់ នៅតំបន់ហ្កាហ្សាស្ទ្រីប។ ក្រុមនេះ បានបន្ថែមថា ខ្លួនទទូចឲ្យអ៊ីស្រាអែល និងសហរដ្ឋអាមេរិកទទួលខុសត្រូវចំពោះផលវិបាកនានានៃការកាន់កាប់ទីក្រុងហ្កាហ្សានេះ។

កាលពីថ្ងៃទី ០៨ ខែសីហា អ៊ីស្រាអែល បានអនុម័តផែនការដែលស្នើឡើងដោយលោកនាយករដ្ឋមន្ត្រី លោក បេនចាមីន ណេតាន់យ៉ាហ៊ូ (Benjamin Netanyahu) ដើម្បីគ្រប់គ្រងទឹកដីទីក្រុងហ្កាហ្សាទាំងមូល និងពង្រីកប្រតិបត្តិការ នៅក្នុងដែនដីប៉ាឡេស្ទីននេះ។ នៅថ្ងៃទី ២០ ខែសីហា រដ្ឋមន្ត្រីការពារជាតិអ៊ីស្រាអែល លោក Israel Katz បានអនុម័តផែនការដណ្តើមកាន់កាប់ទីក្រុងនេះ។ យោងតាមក្រុមហ៊ុនទូរទស្សន៍ និងវិទ្យុ Kan State កងកម្លាំងការពារអ៊ីស្រាអែល (IDF) បានចាប់ផ្តើមប្រយុទ្ធរួចហើយ នៅជាយក្រុងហ្កាហ្សា ដោយរៀបចំសម្រាប់ការពង្រីក។ យោងតាមព័ត៌មានរបស់ខ្លួន ផែនការសម្រាប់ប្រតិបត្តិការកាន់កាប់ទីក្រុងនេះ នឹងត្រូវដាក់ជូនគណៈរដ្ឋមន្ត្រីអ៊ីស្រាអែល ដើម្បីអនុម័ត នៅថ្ងៃទី ២១ ខែសីហា។