នាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃព្រហស្បតិ៍ (ទី២១ ខែសីហា) បានបង្កើនការវាយប្រហារផ្ទាល់ខ្លួនទៅលើសមភាគីអូស្ត្រាលី លោក Anthony Albanese ជុំវិញការសម្រេចចិត្តរបស់រដ្ឋាភិបាលប្រទេសនេះ ក្នុងការទទួលស្គាល់រដ្ឋប៉ាឡេស្ទីន ដោយនិយាយថា ប្រវត្តិនយោបាយរបស់លោក Albanese ត្រូវបានធ្វើខូចជារៀងរហូត។

គួរបញ្ជាក់ថា ទំនាក់ទំនងការទូត រវាងអូស្ត្រាលី និងអ៊ីស្រាអែល បានជួបនឹងភាពអាប់អួ ចាប់តាំងពីរដ្ឋាភិបាលគណបក្សការងារកណ្តាល-ឆ្វេងនិយមរបស់លោក Albanese កាលពីសប្តាហ៍មុន បានប្រកាសថា ខ្លួននឹងទទួលស្គាល់ឋានៈជារដ្ឋប៉ាឡេស្ទីនតាមលក្ខខណ្ឌ បន្ទាប់ពីមានចំណាត់ការស្រដៀងគ្នាពីសំណាក់ប្រទេសបារាំង អង់គ្លេស និងកាណាដា។ ការសម្រេចនេះបានជំរុញឲ្យលោក Netanyahu ចាប់ផ្តើមការវាយប្រហារផ្ទាល់ខ្លួនលើលោក Albanese ហើយលោកបានដំឡើងការថ្កោលទោសទ្វេដង នៅក្នុងបទសម្ភាសន៍មួយដែលត្រូវបានចាក់ផ្សាយនៅលើប្រព័ន្ធផ្សព្វផ្សាយ Sky News Australia។

បន្ទាប់ពីពិពណ៌នាអំពីលោក Albanese កាលពីដើមសប្តាហ៍នេះថា ជា «អ្នកនយោបាយទន់ខ្សោយដែលក្បត់អ៊ីស្រាអែល និងបោះបង់ចោលជនជាតិជ្វីហ្វរបស់អូស្ត្រាលី» លោក Netanyahu បានលើកឡើងបន្ថែមទៀតថា៖ «ខ្ញុំគិតថា កំណត់ត្រារបស់លោកត្រូវបានធ្វើឲ្យខូចជារៀងរហូត ដោយភាពទន់ខ្សោយដែលលោកបានបង្ហាញនៅចំពោះមុខក្រុមភេរវករហាម៉ាស»។ 

កាលពីថ្ងៃទី២០ ខែសីហា លោក Albanese បាននិយាយសម្រាលការរិះគន់របស់លោក Netanyahu ដោយបានបញ្ជាក់ថា លោកមិនបាន «មានទោមនស្សនឹងសម្ដីនោះឡើយ» ហើយថា លោកបានប្រព្រឹត្តចំពោះមេដឹកនាំនៃប្រទេសដទៃទៀត ដោយសេចក្ដីគោរព។ 

ក្រុមប្រឹក្សាប្រតិបត្តិនៃសហគមន៍ជនជាតិជ្វីហ្វអូស្ត្រាលី នៅក្នុងលិខិតដាច់ដោយឡែកពីគ្នាដែលបានផ្ញើកាលពីថ្ងៃទី២០ ខែសីហា ទៅកាន់មេដឹកនាំទាំង២ បានជំរុញឲ្យមានការពិភាក្សាដោះស្រាយការខ្វែងគំនិតគ្នា តាមរយៈទំនាក់ទំនងការទូត ជាជាងការលើកឡើងជាសាធារណៈ៕