ប្រមុខអង្គការសហប្រជាជាតិ (UN) លោក Antonio Guterres នៅថ្ងៃព្រហស្បតិ៍ (ទី២១ ខែសីហា) នេះ បានលើកឡើងថា អាហ្រ្វិកមានអ្វីគ្រប់យ៉ាងដែលតំបន់នេះត្រូវការ ដើម្បីក្លាយជា «មហាអំណាចផ្នែកថាមពលកកើតឡើងវិញ» ខណៈដែលលោកបានអំពាវនាវឲ្យមានការវិនិយោគកាន់តែច្រើននៅក្នុងថាមពលបៃតង នៅទូទាំងទ្វីបដែលសម្បូរដោយធនធានមួយនេះ។

លោក Guterres បានលើកឡើងបែបនេះនៅឯសន្និសីទអភិវឌ្ឍន៍រយៈពេល ៣ថ្ងៃ ក្នុងប្រទេសជប៉ុន ដែលមានការចូលរួមដោយបណ្ដាមេដឹកនាំអាហ្វ្រិក ជាកន្លែងដែលទីក្រុងតូក្យូកំពុងផ្តល់ជូនខ្លួនឯងជាជម្រើសមួយជំនួសប្រទេសចិន ខណៈដែលប្រទេសអាហ្វ្រិក បានប្រឹងប្រែងដោះស្រាយវិបត្តិបំណុលដែលកាន់តែធ្ងន់ធ្ងរឡើងៗ ដោយសារការកាត់ជំនួយរបស់លោកខាងលិច ជម្លោះ និងបម្រែបម្រួលអាកាសធាតុ។

នៅឯសន្និសីទអន្តរជាតិទីក្រុងតូក្យូ ស្តីពីការអភិវឌ្ឍអាហ្វ្រិក លោក Guterres បានលើកឡើងថា៖ «យើងត្រូវតែប្រមូលផ្តុំហិរញ្ញវត្ថុ និងបច្ចេកវិទ្យា ដើម្បីឲ្យធនធានធម្មជាតិរបស់ទ្វីបអាហ្រ្វិកផ្តល់ផលប្រយោជន៍ដល់ប្រជាជនអាហ្រ្វិក យើងត្រូវបង្កើតថាមពលកកើតឡើងវិញ និងមូលដ្ឋានកម្មន្តសាលឲ្យបានរឹងមាំ នៅទូទាំងទ្វីបនេះ»។

លោកអគ្គលេខាធិការរូបនេះ បានបញ្ជាក់បន្ថែមថា៖ «ថាមពលបៃតង នៅទ្វីបអាហ្រ្វិក កាត់បន្ថយការចំណាយផ្នែកថាមពល ធ្វើពិពិធកម្មខ្សែច្រវាក់ផ្គត់ផ្គង់ និងពន្លឿនការកាត់បន្ថយការបំភាយកាបូន សម្រាប់មនុស្សគ្រប់គ្នា»។

ប្រទេសចិនបានបោះទុនវិនិយោគយ៉ាងច្រើន នៅទ្វីបអាហ្រ្វិក ក្នុងរយៈពេល ១ទសវត្សរ៍កន្លងមកនេះ ដោយក្រុមហ៊ុនរបស់ប្រទេសនេះ នៅទីនោះ បានចុះហត្ថលេខាលើកិច្ចព្រមព្រៀងដែលមានតម្លៃរាប់រយពាន់លានដុល្លារ ដើម្បីផ្តល់ហិរញ្ញប្បទានដល់កំពង់ផែដឹកជញ្ជូន ផ្លូវដែក ផ្លូវថ្នល់ និងគម្រោងផ្សេងៗទៀតនៅក្រោមគំនិតផ្តួចផ្តើមហេដ្ឋារចនាសម្ព័ន្ធពិភពលោករបស់ទីក្រុងប៉េកាំង គឺខ្សែក្រវាត់ និងផ្លូវ៕