រដ្ឋមន្ត្រីការពារជាតិហូឡង់ លោក Ruben Brekelmans បាននិយាយថា ប្រទេសរបស់លោកកំពុងបញ្ជូនទាហាន៣០០នាក់ និងប្រព័ន្ធមីស៊ីលការពារដែនអាកាសប៉ាទ្រីយ៉ូត(Patriot) ទៅកាន់ប្រទេសប៉ូឡូញ ដើម្បី «ការពារទឹកដីរបស់សម្ព័ន្ធយោធាណាតូ ការពារការផ្គត់ផ្គង់ដល់អ៊ុយក្រែន និងរារាំងការឈ្លានពានរបស់រុស្ស៊ី»។

សេចក្តីប្រកាសរបស់ប្រទេសហូឡង់កាលពីថ្ងៃពុធ បានធ្វើឡើង ខណៈមន្ត្រីប៉ូឡូញបាននិយាយថា វត្ថុដែលបានធ្លាក់ក្នុងចំការពោតនៅភាគខាងកើតប្រទេសប៉ូឡូញអាចជាយានដ្រូន Shahed កំណែថ្មីរបស់រុស្ស៊ី។ មន្ត្រីម្នាក់ដែលត្រូវបានដកស្រង់សម្តីដោយទីភ្នាក់ងារសារព័ត៌មានរដ្ឋ PAP របស់ប្រទេសប៉ូឡូញ បាននិយាយថា ការផ្ទុះចេញពីយានដ្រូនបានបំបែកបង្អួចលំនៅឋានជាច្រើនខ្នងក្នុងភូមិ Osiny ជិតព្រំដែនប្រទេសប៉ូឡូញជាមួយអ៊ុយក្រែន ប៉ុន្តែពុំមានអ្នករងរបួសណាម្នាក់ត្រូវបានរាយការណ៍ឡើយ។

លោក Brekelmans បានប្រាប់ទូរទស្សន៍ NOS របស់ហូឡង់កាលពីថ្ងៃពុធថា ការគាំទ្រផ្នែកយោធាដល់ប្រទេសប៉ូឡូញបានមកជាមួយប្រទេសផ្សេងទៀតដែលផ្តល់ជំនួយស្រដៀងគ្នាដល់ប្រទេសសមាជិកណាតូដែលមានព្រំដែនជាប់អ៊ុយក្រែន។ រដ្ឋមន្ត្រីការពារជាតិហូឡង់ លោក Ruben Brekelmans បានសង្កត់ធ្ងន់ថាប្រព័ន្ធប៉ាទ្រីយ៉ូតនឹងដាក់ឲ្យធ្វើប្រតិបត្តិការនៅក្នុងប្រទេសប៉ូឡូញ រួមជាមួយទាហាន៣០០នាក់ ប៉ុន្តែពុំមែនមានន័យថាប្រទេសហូឡង់ កំពុងដាក់កងទ័ពនៅលើដីអ៊ុយក្រែននោះទេ។ ប្រទេសអាល្លឺម៉ង់បានដាក់ពង្រាយយន្តហោះប្រយុទ្ធ Eurofighter ចំនួនប្រាំគ្រឿងទៅកាន់ប្រទេសប៉ូឡូញកាលពីដើមខែនេះ។ ជាមួយគ្នានេះសារព័ត៌មាន DPA បានរាយការណ៍កាលពីថ្ងៃពុធថា ប្រទេសអាល្លឺម៉ង់ក៏បានបញ្ជូនយន្តហោះចម្បាំង Eurofighter ចំនួនប្រាំគ្រឿង និងទាហានប្រមាណ២៧០នាក់ទៅកាន់ប្រទេសរូម៉ានី ផងដែរ។