រដ្ឋមន្ត្រីការបរទេសហ្ស៊កដានី បាននិយាយកាលពីថ្ងៃពុធថា ការវាយលុករបស់អ៊ីស្រាអែលលើតំបន់ហ្កា ហ្សា បានបង្កឲ្យមាន «ការសម្លាប់រង្គាល និងការអត់ឃ្លាន» ហើយថា សកម្មភាពកាន់តែទូលំទូលាយរបស់ខ្លួន កំពុង «បំផ្លាញក្តីសង្ឃឹមទាំងស្រុង» សម្រាប់សន្តិភាពនៅមជ្ឈិមបូព៌ា។

ការអត្ថាធិប្បាយរបស់លោក បានកើតឡើង បន្ទាប់ពីរដ្ឋមន្ត្រីការពារជាតិអ៊ីស្រាអែលលោក Israel Katz បានអនុម័តផែនការមួយ ដើម្បីដណ្តើមយកទីក្រុងហ្កាហ្សា ដែលជាតំបន់ទីក្រុងដែលមានប្រជាជនរាប់សែននាក់ នៅភាគខាងជើងនៃទឹកដីប៉ាឡេស្ទីន។

យោងតាមអង្គការសហប្រជាជាតិ ប្រជាជនភាគច្រើននៃទឹកដីនេះ ត្រូវបានផ្លាស់ទីលំនៅ ចាប់តាំងពីសង្រ្គាម បានចាប់ផ្តើម។

ថ្លែងទៅកាន់សមភាគីរុស្ស៊ី លោក Sergei Lavrov ក្នុងកិច្ចប្រជុំនៅទីក្រុងមូស្គូ រដ្ឋមន្ត្រីការបរទេសហ្ស៊កដានី លោក Ayman Safadi បាននិយាយថា លោកសង្ឃឹមថា នឹងពិភាក្សាអំពី «កិច្ចខិតខំប្រឹងប្រែង ដើម្បីបញ្ចប់ការឈ្លានពានលើតំបន់ហ្កាហ្សា និងការសម្លាប់រង្គាល និងការអត់ឃ្លានដែលខ្លួនកំពុងបង្កើត»។

លោកបានបន្ថែមថា ការធ្វើបែបនេះ គឺបន្ថែមលើ «វិធានការខុសច្បាប់ដែលបន្តធ្វើឲ្យប៉ះពាល់ដល់ដំណោះស្រាយរដ្ឋពីរ និងធ្វើឲ្យបាត់បង់ការរំពឹងទុកទាំងស្រុងសម្រាប់សន្តិភាពក្នុងតំបន់»។