ប្រធានាធិបតីអ៊ុយក្រែន លោក Volodymyr Zelenskyy នៅថ្ងៃព្រហស្បតិ៍ (ទី២១ ខែសីហា) នេះ បានប្រាប់ឲ្យដឹងថា ប្រទេសរបស់លោកបានធ្វើតេស្តដោយជោគជ័យនូវមីស៊ីលតម្រង់គោលដៅរយៈចម្ងាយឆ្ងាយដែលមានសមត្ថភាពវាយប្រហារគោលដៅរហូតដល់ ៣.០០០គីឡូម៉ែត្រ ហើយការផលិតទ្រង់ទ្រាយធំ អាចចាប់ផ្តើមនៅខែកុម្ភៈឆ្នាំក្រោយ។

លោក Zelenskyy បានប្រាប់អ្នកសារព័ត៌មានថា៖ «មីស៊ីលនេះបានឆ្លងកាត់ការសាកល្បងដោយជោគជ័យ។ បច្ចុប្បន្ននេះ វាគឺជាមីស៊ីលដ៏ជោគជ័យបំផុតរបស់យើង ពោលគឺវាអាចហោះបាន ៣.០០០គីឡូម៉ែត្រ ដែលជាចម្ងាយដ៏មានសារៈសំខាន់ណាស់»។

ជាមួយគ្នានេះ លោក Zelenskyy ក៏បានច្រានចោលផងដែរមិនឲ្យមានតួនាទីណាមួយពីប្រទេសចិន ក្នុងការធានាសន្តិសុខ សម្រាប់អ៊ុយក្រែន បន្ទាប់ពីមានការលុកលុយរបស់រុស្ស៊ី ដោយចោទប្រកាន់ថា ទីក្រុងប៉េកាំង បានគាំទ្រទីក្រុងមូស្គូ។ 

លើសពីនេះ លោក Zelenskyy បានបញ្ជាក់បន្ថែមថា លោកបានស្នើសុំប្រធានាធិបតីអាមេរិក លោក Donald Trump ឲ្យដាក់សម្ពាធលើប្រទេសហុងគ្រី កុំឲ្យរារាំងដល់ការចរចារបស់អ៊ុយក្រែនជាមួយសហភាពអឺរ៉ុប (EU)។

លោក Zelenskyy បាននិយាយថា៖ «ខ្ញុំបានស្នើទៅលោកប្រធានាធិបតី Trump ថា ទីក្រុង Budapest មិនគួររារាំងការចូលជាសមាជិកសហភាពអឺរ៉ុបរបស់យើងទេ។ លោកប្រធានាធិបតី Trump បានសន្យាថា ក្រុមរបស់លោកនឹងធ្វើការលើបញ្ហានេះ»៕