តាមរយៈផតឃែស្ថនៅលើបណ្ដាញសង្គម Facebook នាថ្ងៃព្រហស្បតិ៍ (ទី២១ ខែសីហា) នេះ រដ្ឋមន្ត្រីការបរទេសហុងគ្រី លោក Peter Szijjarto បាននិយាយថា ប្រទេសហុងគ្រី បានស្នើសុំធ្វើជាម្ចាស់ផ្ទះកិច្ចចរចាសន្តិភាព រវាងរុស្ស៊ី និងអ៊ុយក្រែន ចំនួន ២ដង ហើយការផ្តល់ជូននៅតែរក្សាដដែល។

លោក Szijjarto បានឆ្លើយតបចំពោះសេចក្ដីរាយការណ៍ ដែលថា សេតវិមានកំពុងសម្លឹងមើលរដ្ឋធានី Budapest នៃប្រទេសហុងគ្រី ជាកន្លែងសម្រាប់កិច្ចប្រជុំត្រីភាគី ដែលអាចកើតមាន រវាងប្រធានាធិបតីអាមេរិក លោក Donald Trump មេដឹកនាំរុស្ស៊ី លោក Vladimir Putin និងប្រធានាធិបតីអ៊ុយក្រែន លោក Volodymyr Zelenskiy។

សារព័ត៌មាន Politico បានរាយការណ៍កាលពីថ្ងៃអង្គារថា សេវាសម្ងាត់របស់សហរដ្ឋអាមេរិក កំពុងរៀបចំសម្រាប់កិច្ចប្រជុំកំពូល នៅក្នុងប្រទេសអឺរ៉ុបកណ្តាល ដោយទីក្រុង Budapest បានលេចឡើងជាជម្រើសទី១ សម្រាប់សេតវិមាន។

នៅក្នុងផតឃែស្ថប្រចាំថ្ងៃដែលរៀបចំដោយសមាជិករដ្ឋាភិបាល លោក Szijjarto បាននិយាយថា៖ «ប្រសិនបើយើងត្រូវបានស្នើឲ្យផ្ដល់ជំនួយ យើងត្រៀមខ្លួនជាស្រេច ដើម្បីផ្តល់នូវលក្ខខណ្ឌសមរម្យ និងសុវត្ថិភាព សម្រាប់ការចរចាសន្តិភាពបែបនេះ។ យើងរីករាយ ប្រសិនបើយើងអាចរួមចំណែកដល់ភាពជោគជ័យនៃកិច្ចប្រឹងប្រែងសន្តិភាព»។

តែយ៉ាងណាក្ដី រដ្ឋមន្ត្រីការបរទេសបានបដិសេធរបាយការណ៍ពីប្រព័ន្ធផ្សព្វផ្សាយដែលបានចេញផ្សាយកាលពីថ្ងៃអង្គារ ក្នុងនោះរួមមានទាំងពីសារព័ត៌មាន Reuters និង Bloomberg ផងដែរ ដែលថា ប្រធានាធិបតីសហរដ្ឋអាមេរិក លោក Donald Trump បានទូរសព្ទទៅនាយករដ្ឋមន្ត្រីហុងគ្រី លោក Viktor Orban ដើម្បីជជែកអំពីការចូលជាសមាជិកសហភាពអឺរ៉ុបរបស់អ៊ុយក្រែន បន្ទាប់ពីមានកិច្ចប្រជុំកំពូលកាលពីថ្ងៃចន្ទ ជាមួយប្រធានាធិបតីអ៊ុយក្រែន និងបណ្ដាមេដឹកនាំអឺរ៉ុប៕