តំបន់ជាច្រើន នៅក្នុងប្រទេសរុស្ស៊ី និងផ្នែកខ្លះរបស់អ៊ុយក្រែនដែលស្ថិតក្រោមការគ្រប់គ្រងរបស់ខ្លួន កំពុងរាយការណ៍ពីកង្វះខាតប្រេងសាំង បន្ទាប់ពីអ៊ុយក្រែនបានបង្កើនការវាយប្រហារលើរោងចក្រចម្រាញ់ប្រេងរបស់រុស្ស៊ី ក្នុងខែនេះ និងចំពេលមានការកើនឡើងនូវតម្រូវការប្រេងតាមរដូវកាល។

រុស្ស៊ីបានដាក់បម្រាមការនាំចេញប្រេងសាំង សម្រាប់ក្រុមហ៊ុនផលិតប្រេង កាលពីថ្ងៃទី២៨ ខែកក្កដា ក្នុងគោលបំណងបង្ការការខ្វះខាត នៅពេលមានតម្រូវការខ្ពស់បំផុត ដោយសារការធ្វើដំណើរ នៅរដូវក្តៅ និងការប្រមូលផលគ្រាប់ធញ្ញជាតិ។ ប៉ុន្តែអ្នកជំនាញទីផ្សារមួយចំនួន បានលើកឡើងថា ចំណាត់ការនេះនឹងមិនគ្រប់គ្រាន់ ដើម្បីបញ្ចៀសវិបត្តិប្រេងបានឡើយ។

ពួកគេបានបញ្ជាក់ថា បញ្ហាកំពុងកាន់តែធ្ងន់ធ្ងរឡើង ដោយសារឧបសគ្គផ្នែកដឹកជញ្ជូន ការស្តុកក្នុងស្រុកទាប និងការងារជួសជុល នៅរោងចក្រចម្រាញ់ប្រេង។

ចាប់តាំងពីដើមខែសីហា អ៊ុយក្រែនបានកំណត់គោលដៅលើរោងចក្រចម្រាញ់ប្រេងមួយចំនួន រួមមាន Novokuibyshevsk, Syzran, Ryazan និង Volgograd ជាការឆ្លើយតបទៅនឹងការវាយប្រហារដោយមីស៊ីល និងយានដ្រូនរបស់ទីក្រុងមូស្គូ។

នៅតំបន់ Primorye ចុងភាគខាងកើតរបស់ប្រទេសរុស្ស៊ី ប្រព័ន្ធផ្សព្វផ្សាយក្នុងស្រុកបានរាយការណ៍ថា ជួរដែលលាតសន្ធឹងទៅក្រោយរាប់គីឡូម៉ែត្រ នៅពេលដែលអ្នកបើកបរ បានឈប់បន្តកន្ទុយគ្នា ដើម្បីចាក់ប្រេងសាំង។ អាជ្ញាធរបានប្រាប់ថា កង្វះខាតនេះ គឺដោយសារភ្ញៀវទេសចរច្រើនពេក។

ហើយបើយោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា ក្រុមហ៊ុនប្រេង NNK បានឲ្យដឹងថា រថយន្តដឹកជញ្ជូនប្រេងសាំងជាច្រើនគ្រឿងរបស់ខ្លួន នៅក្នុងតំបន់ បានជាប់នៅក្នុងការកកស្ទះចរាចរណ៍រយៈពេលពី ៣ ទៅ ៦ម៉ោង ក្នុងមួយលើក ដោយសារការងារជួសជុលនៅតាមដងផ្លូវ៕