តាមប្រភពបីដែលដឹងពីការគិតរបស់វិមានក្រឹមឡាំង បានប្រាប់សារព័ត៌មាន Reuters ថាប្រធានាធិបតីរុស្ស៊ី លោក Vladimir Putin កំពុងទាមទារឱ្យអ៊ុយក្រែនបោះបង់តំបន់ Donbas ភាគខាងកើតទាំងអស់ លែងស្រមៃមហិច្ឆតាចូលរួមជាមួយអង្គការណាតូ រក្សាអព្យាក្រឹត និងគ្មានវត្តមានកងទ័ពលោកខាងលិចក្នុងប្រទេសអ៊ុយក្រែន ជាការទាមទារម្ដងហើយម្ដងទៀតជាយូរមកហើយ។

ប្រធានាធិបតីរុស្ស៊ីបានជួបលោក Donald Trump នៅរដ្ឋអាឡាស្កាកាលពីថ្ងៃសុក្រ១៥សីហា សម្រាប់ជំនួបកំពូលរុស្ស៊ី-អាមេរិក លើកដំបូងក្នុងរយៈពេលជាង ៤ ឆ្នាំ ហើយបានចំណាយពេលស្ទើរតែទាំងអស់នៃកិច្ចប្រជុំបិទទ្វារជិត ៣ ម៉ោងរបស់មេដឹកនាំទាំងពីរដើម្បីពិភាក្សាអំពីអ្វីដែលជាការសម្របសម្រួលលើអ៊ុយក្រែន នេះបើយោងតាមប្រភពដែលសុំមិនបញ្ចេញឈ្មោះ។

ដោយឈរក្បែរលោក Trump លោក Putin បាននិយាយថាជំនួបនេះនឹងសង្ឃឹមថាជាការបើកផ្លូវទៅរកសន្តិភាពក្នុងប្រទេសអ៊ុយក្រែន ប៉ុន្តែមេដឹកនាំទាំងពីរពុំបានផ្តល់ព័ត៌មានជាក់លាក់អំពីអ្វីដែលលោកទាំងពីរបានពិភាក្សានោះទេ។

នៅក្នុងការរាយការណ៍លម្អិតបំផុតដែលមានមូលដ្ឋាននៅរុស្ស៊ីរហូតមកដល់បច្ចុប្បន្នលើការផ្តល់ជូនរបស់លោក Putin នៅឯកិច្ចប្រជុំនោះ សារព័ត៌មាន Reuters អាចគូសបញ្ជាក់ពីបំណងនៃអ្វីដែលវិមានក្រឹមឡាំងចង់ឃើញនៅក្នុងកិច្ចព្រមព្រៀងសន្តិភាពដែលអាចធ្វើទៅបានដើម្បីបញ្ចប់សង្រ្គាម បណ្ដាលឲ្យមនុស្សដ៏ច្រើនស្លាប់ និងរបួស។

យោងតាមការប៉ាន់ប្រមាណរបស់សហរដ្ឋអាមេរិក និងទិន្នន័យប្រភពបើកចំហបានឲ្យដឹងថា ប្រទេសរុស្ស៊ីគ្រប់គ្រងប្រហែល៨៨% នៃតំបន់ Donbas និង៧៣% នៃតំបន់Zaporizhzhia និងតំបន់ Kherson ៕