ក្រុមមន្ត្រីបាននិយាយកាលពីថ្ងៃព្រហស្បតិ៍ ទី២១ សីហា ថា រុស្ស៊ីបានបើកការវាយប្រហារដោយយានដ្រូន និងមីស៊ីលដ៏កម្រ ទៅលើភាគខាងលិចប្រទេសអ៊ុយក្រែន ដោយបានវាយប្រហារទៅលើគោលដៅជាច្រើនកន្លែង រួមទាំងរោងចក្រអេឡិចត្រូនិកគ្រប់គ្រងដោយសហរដ្ឋអាមេរិក ដែលនេះជាការដាក់ភាពមិនច្បាស់លាស់បន្ថែមទៀតទៅក្នុងកិច្ចខិតខំប្រឹងប្រែងដើម្បីបញ្ចប់សង្គ្រាម។

ការវាយប្រហារតាមអាកាសលើផ្នែកមួយរបស់អ៊ុយក្រែន ដែលបានបញ្ចៀសការវាយប្រហារដាក់គោលដៅបែបនេះ គឺជាការវាយប្រហារទ្រង់ទ្រាយធំបំផុតមួយរបស់រុស្ស៊ីក្នុងឆ្នាំនេះ ហើយបានធ្វើឡើងក្នុងពេលដែលទីក្រុងមូស្គូជំទាស់ទៅនឹងគំនិតសំខាន់ៗនៃសំណើដែលអាចបញ្ចប់ការប្រយុទ្ធគ្នាបន្ទាប់ពីការវាយលុករបស់រុស្ស៊ីកាលពីខែកុម្ភៈ ឆ្នាំ២០២២ ទៅលើប្រទេសជិតខាងខ្លួន។

ប្រធានាធិបតីសហរដ្ឋអាមេរិក លោក Donald Trump បានពិភាក្សាអំពីសង្គ្រាមជាមួយប្រធានាធិបតីរុស្ស៊ី លោក Vladimir Putin នៅរដ្ឋ Alaska កាលពីសប្តាហ៍មុន មុនពេលជួបប្រធានាធិបតីអ៊ុយក្រែន លោក Volodymyr Zelenskyy នៅសេតវិមាន។ នៅក្នុងការបង្ហោះតាមបណ្តាញផ្សព្វផ្សាយសង្គមកាលពីថ្ងៃព្រហស្បតិ៍លោក Trump បានរិះគន់អ្នកកាន់តំណែងមុនរបស់លោក គឺលោក Joe Biden សម្រាប់ការមិនផ្តល់ឱ្យអ៊ុយក្រែននូវសព្វាវុធបន្ថែមទៀតដែលប្រទេសនេះត្រូវការដើម្បី «ប្រយុទ្ធតបតវិញ»។ លោក Trump បាននិយាយថា «វាពិតជាពិបាក ប្រសិនបើមិនអាចធ្វើទៅបាន ដើម្បីឈ្នះសង្រ្គាមដោយមិនវាយប្រហារលើប្រទេសឈ្លានពាន»។

បណ្តាប្រទេសនៅអឺរ៉ុបកំពុងពិភាក្សាអំពីរបៀបដែលពួកគេអាចដាក់ពង្រាយយុទ្ធោបករណ៍ ដើម្បីទប់ស្កាត់ការវាយលុករបស់រុស្ស៊ីនៅក្រោយសង្គ្រាមលើប្រទេសអ៊ុយក្រែន។ ប៉ុន្តែវិមានក្រឹមឡាំងនឹងមិនទទួលយកការដាក់ពង្រាយកងទ័ពណាមួយពីប្រទេសណាតូឡើយ ហើយរដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា ការរៀបចំសន្តិសុខសម្រាប់អ៊ុយក្រែនដោយគ្មានទីក្រុងមូស្គូគឺគ្មានន័យអ្វីឡើយ។