ប្រភពចំនួនពីរដែលដឹងពីបញ្ហានេះបាននិយាយថា ប្រធានាធិបតីចិន លោក Xi Jinping ទំនងជាមិនទៅចូលរួមកិច្ចប្រជុំកំពូលដ៏ធំនៃមេដឹកនាំអាស៊ីក្នុងខែតុលា ខាងមុខនេះទេ ដោយហាក់បំផ្លាញក្ដីរំពឹងដែលថាអាចមានជំនួបកំពូលជាមួយប្រធានាធិបតីអាមេរិក លោក Donald Trump ក្នុងព្រឹត្តិការណ៍នោះ។

នាយករដ្ឋមន្ត្រីម៉ាឡេស៊ី លោក Anwar Ibrahim ក្នុងខែនេះបាននិយាយថា ទាំងលោក Xi និងលោក Trump ត្រូវបានរំពឹងថានឹងចូលរួមក្នុងកិច្ចប្រជុំកំពូលរបស់មេដឹកនាំសមាគមប្រជាជាតិអាស៊ីអាគ្នេយ៍ (អាស៊ាន) នៅថ្ងៃទី២៦-២៨ ខែតុលា នៅទីក្រុងកូឡាឡាំពួរ។ ចំណុចនេះបាននាំឱ្យអ្នកវិភាគប៉ាន់ស្មានថា លោក Trump និងលោក Xi ដែលកំពុងជាប់គាំងក្នុងភាពតានតឹងពាណិជ្ជកម្ម អាចមានការជួបមុខគ្នាដោយផ្ទាល់ជាលើកដំបូង ក្នុងអាណត្តិទីពីររបស់លោក Trump ។

ប្រភពក្នុងតំបន់ចំនួនពីរបានបញ្ជាក់ថា នាយករដ្ឋមន្ត្រីចិន លោក Li Qiang -- ដែលបានចូលរួមកិច្ចប្រជុំអាស៊ានមួយផ្សេងទៀតរួចមកហើយជាមួយមេដឹកនាំឈូងសមុទ្រក្នុងខែឧសភា -- ត្រូវបានរំពឹងថានឹងតំណាងឱ្យប្រទេសចិន ជំនួសវិញក្នុងកិច្ចប្រជុំខែតុលានោះ។

ទាក់ទងនឹងបញ្ហានេះ ក្រសួងការបរទេសចិន និយាយថា "ប្រទេសចិន តែងយកចិត្តទុកដាក់ចំពោះទំនាក់ទំនងចិន-អាស៊ាន និងកិច្ចសហប្រតិបត្តិការអាស៊ីបូព៌ា។ ប៉ុន្តែមិនមានព័ត៌មានណាមួយដើម្បីផ្តល់ឱ្យលើសំណួរនេះទេ"។ លោក Trump ធ្លាប់និយាយនៅដើមខែនេះថា លោកនឹងជួបលោក Xi នៅមុនដំណាច់ឆ្នាំនេះ ប្រសិនបើកិច្ចព្រមព្រៀងពាណិជ្ជកម្មបានសម្រេច ដោយបន្ថែមថា "ភាគីទាំងពីរកំពុងខិតជិតដល់កិច្ចព្រមព្រៀងមួយហើយ"៕