​បាល់ទាត់៖ សមាគម​កីឡាបាល់ទាត់​កងយោធពល​ខេមរភូមិន្ទ បានប្រកាស​ចុះ​កុងត្រា​ជាថ្មី​ជាមួយ​ខ្សែប្រយុទ្ធ​សញ្ជាតិ​ជប៉ុន Takumu Nishihara ដើម្បី​ត្រៀម​រដូវ​កាល​ថ្មីឆ្នាំ​២០២២ ខាងមុខ។​ ​អតីត​ខ្សែប្រយុទ្ធ​ក្លិប Young Elephants នៃ​លី​គ​កំពូល​ឡាវ​រូបនេះធ្លាប់បាន​ចុះ​កុងត្រា​ ជាមួយ​ក្រុម​កងយោធពល​ខេមរភូមិន្ទ​ម្ដង​រួចមកហើយកាលពីដើមឆ្នាំ​២០២១ តែ​ក្រោយ​ហ្វឹកហាត់ និង​ប្រកួត Pre-Season បាន​ជាង ១ខែ​កន្លះកីឡាករ​វ័យ ២៩​ឆ្នាំ​រូបនេះក៏ត្រូវ​បាន​ក្លិប​សម្រេច​ប្រកាស​ចែកផ្លូវ​ភ្លាមៗ ក្រោម​មូលហេតុ​រូបគេបាន​រងរបួស​ដាច់​ស​រ​សៃ​ពួរ​ជ​ង្គ​ង់​(ACL)។​

​រយៈពេល ១​រដូវ​កាលក្រោយ​ចាក​ចេញពី​ប្រទេស​កម្ពុជា Takumu Nishihara បាន​ត្រឡប់​ទៅ​ស្រុកកំណើត​វិញ ហើយ​បានធ្វើ​ការវះកាត់​ដើមខែ​មេសា។ បន្ទាប់ពី​សម្រាក​ព្យាបាល​ប្រមាណ ៧​ខែរូបគេ​ក៏បាន​អះអាង​បានជា​សះស្បើយ ១០០% តែ​ពុំទាន់​មាន​ក្លិប​ណា​នោះទេរហូតដល់​ថ្ងៃទី​១៩ ខែមករា​ម្សិលមិញ ក៏ត្រូវ​បាន​ក្រុម​សមាជិក​ក្របខណ្ឌ​លី​គ​កំពូល​កម្ពុជា ប្រកាស​ពី​ការ​ត្រឡប់​ជាថ្មី​តែម្ដង។​ ​នេះ​គឺជា​កីឡាករ​បរទេស​ចំណូល​ថ្មី​ដំបូង ដែល​ក្រុម​កងយោធពល​ខេមរភូមិន្ទបាន​នាំចូល​ត្រៀម​រដូវ​កាល​ថ្មី ហើយក៏​ជា​កីឡាករ​បរទេស​ទី​២ ផងដែរបន្ទាប់ពី​ក្លិប​បន្ដ​កុងត្រា​ជាមួយ​ខ្សែបម្រើ​ជប៉ុន Yuta Kikuchi ស្របពេល​ចែកផ្លូវ​ជាមួយ​កីឡាករ​បរទេស ៤​រូបក្រោយ​ចប់​រដូវ​កាល​ឆ្នាំ​២០២១ រួមមាន​កីឡាករ Romario, Rio Sakuma, Chan Youngha និង​កិ​ឡាករ Timothy។​

​ក្រៅពីនេះក្លិប​ក៏បាន​ស្វាគមន៍​ការ​ត្រឡប់​របស់​អ្នកចាំទី អ៊ុំ វិចិត្រ ក្រោយ​ផ្ទេរ​ទៅ​ក្លិប​ភ្នំពេញ​ក្រោ​នក្រោម​លក្ខខណ្ឌ​ខ្ចី​ជើង ១​រដូវ​កាល ក៏ដូចជា​ការប្រកាស​តែងតាំង​លោក ទេព ឡុង​រចនា ជា​អ្នកចាត់ការ​ក្រុម ក្រោយ​ការចាកចេញ​របស់​អតីត​គ្រូបង្វឹក​ក្រុម​ជម្រើសជាតិ​កម្ពុជា លោក Lee Tae Hoon ផងដែរ៕

​អត្ថបទ៖ លី ឈុន​ឡា