មន្ត្រីជាន់ខ្ពស់UN បាននិយាយកាលពីថ្ងៃព្រហស្បតិ៍ថា ទីភ្នាក់ងារអង្គការសហប្រជាជាតិចំនួន ២៥ និងអង្គការនានា នឹងបន្តការងាររបស់ពួកគេ នៅក្នុងប្រទេសអ៊ីរ៉ាក់ បន្ទាប់ពីការបញ្ចប់នៃបេសកកម្មជំនួយរបស់អង្គការសហប្រជាជាតិសម្រាប់អ៊ីរ៉ាក់ (UNAMI)។

លោក Mohamed Al Hassan តំណាងពិសេសរបស់អគ្គលេខាធិការអង្គការសហប្រជាជាតិប្រចាំប្រទេសអ៊ីរ៉ាក់ និងជាប្រធាន UNAMI បានប្រាប់ទីភ្នាក់ងារសារព័ត៌មានអ៊ីរ៉ាក់ផ្លូវការ (INA) ថា៖«មានតែអាណត្តិរបស់UNAMI ប៉ុណ្ណោះ ដែលនឹងបញ្ចប់ ខណៈដែលការងាររបស់អង្គការសហប្រជាជាតិ នៅក្នុងប្រទេស អ៊ីរ៉ាក់ នឹងបន្ត ដរាបណាអ៊ីរ៉ាក់យល់ថា វាមានភាពចាំបាច់នោះ»។

លោក Al Hassan បានប្រាប់សារព័ត៌មាន INA ថា អង្គការសហប្រជាជាតិ នឹងបន្តបម្រើប្រជាជនអ៊ីរ៉ាក់ និងគាំទ្រផ្លូវសុវត្ថិភាព និងនិរន្តរភាព ឆ្ពោះទៅរកភាពបើកចំហ លទ្ធិប្រជាធិបតេយ្យ និងការអភិវឌ្ឍជាតិ។

នៅខែឧសភា ឆ្នាំ ២០២៤ ក្រុមប្រឹក្សាសន្តិសុខអង្គការសហប្រជាជាតិ បានសម្រេចជាឯកច្ឆន្ទ ក្នុងការបន្តអាណត្តិរបស់ UNAMI សម្រាប់រយៈពេល ១៩ខែចុងក្រោយ ដល់ថ្ងៃទី ៣១ ខែធ្នូ ឆ្នាំ ២០២៥ បន្ទាប់ពីនោះ បេសកកម្មនេះ នឹងបញ្ឈប់ការងារ និងប្រតិបត្តិការទាំងអស់។

UNAMI គឺជាបេសកកម្មនយោបាយ ដែលត្រូវបានបង្កើតឡើងដោយក្រុមប្រឹក្សាសន្តិសុខ ក្នុងឆ្នាំ ២០០៣ តាមសំណើរបស់រដ្ឋាភិបាលអ៊ីរ៉ាក់ បន្ទាប់ពីមានការលុកលុយដោយក្រុមចម្រុះដឹកនាំដោយសហរដ្ឋអា មេរិក។ អាណត្តិចម្បងរបស់ UNAMI គឺការផ្តល់ការណែនាំ ការគាំទ្រ និងជំនួយដល់រដ្ឋាភិបាល និងប្រជាជនអ៊ីរ៉ាក់ ក្នុងវិស័យផ្សេងៗ។