​សហរដ្ឋអាមេរិក៖ កាលពី​ថ្ងៃ​ពុធ​លោក​ប្រធានាធិបតី​អាមេរិក Joe Biden បាន​និយាយថា លោក​រំពឹងថា ប្រធានាធិបតី​រុស្ស៊ី Vladimir Putin នឹង​បញ្ជា​ឲ្យ​ចូល​ឈ្លានពាន​ប្រទេស​អ៊ុយ​ក្រែ​ន និង​បាន​ព្រមាន​ថា ​គ្រោះ​មហន្តរាយ​នឹង​កំពុង​រង់ចាំ​ប្រទេស​រុស្ស៊ី ប្រសិនបើ​រឿង​នោះ​កើតឡើង​មែន​។ ​ការ​អត្ថាធិប្បាយ​របស់​លោក Biden មាន​ឡើង​បន្ទាប់ពី​ក្រុម​ទី​ភ្នាក់ងារ​ចារកម្ម​នានា​បាន​ព្រមាន​ថា ការ​វាយប្រហារ​ណាមួយ​អាច​កើតឡើង​ក្នុង​រយៈពេល​មួយ​ខែ​។

​នៅពេល​ត្រូវបាន​សួរ​អំពី​ទាហាន​រុស្ស៊ី​ជាង ១០ម៉ឺន​នាក់​ដែល​ត្រូវបាន​ដាក់ពង្រាយ​នៅតាម​ព្រំដែន​អ៊ុយ​ក្រែ​ន លោក Biden បាន​តប​ថា ការ​ទស្សន៍ទាយ​របស់​លោកគឺលោក Putin នឹង​ធ្វើ​ពិតមែន ពិត​ណាស់​ថា ​លោក Putin ត្រូវតែ​ធ្វើ​អ្វី​ម្យ៉ាង។​ ​លោក Biden បាន​និយាយ​នៅក្នុង​អំឡុង​សន្និសីទ​សារព័ត៌មាន​តែម្នាក់ឯង​លើក​ទី​២​ ចាប់តាំងពី​ការ​ឡើង​កាន់អំណាច​ថា វា​នឹង​ក្លាយជា​គ្រោះមហន្តរាយ​សម្រាប់​រុស្ស៊ី ប្រសិន​បើ​ពួកគេឈ្លានពាន​ពាន​អ៊ុយ​ក្រែ​ន​បន្ថែមទៀត​នោះ​។ សម្ព័ន្ធមិត្ត និង​ដៃគូ​របស់​យើង​បាន​ត្រៀមខ្លួន​រួច​ជា​ស្រេច​ក្នុងការ​ដាក់ទណ្ឌកម្ម​ធ្ងន់ធ្ងរ​លើ​រុស្ស៊ី និង​សេដ្ឋកិច្ច​របស់​រុស្ស៊ី។

ពេល​និយាយ​ដល់​លទ្ធភាព​ដែល​អាច​នាំ​ឲ្យ​មានការ​ឈ្លានពាន លោក Biden និយាយថា លោកគិតថា លោក Putin នឹង​ស្ដាយក្រោយចំពោះ​ទង្វើ​ដែល​ខ្លួន​បានធ្វើ​។ ​យ៉ាង​ក៏ដោយលោកប្រធានាធិបតី Joe Biden និយាយថា លោកមាន​ក្ដីបារម្ភ​ខ្លាំងណាស់ថា ​ជម្លោះ​រវាង​រុស្ស៊ី​ និង​អ៊ុយ​ក្រែ​នអាច​ផ្ទុះឡើង​គ្រប់គ្រង​លែង​បាន និង​គំរាមកំហែង​ដល់​បណ្ដា​ប្រទេសជិតខាង​៕

អត្ថបទ៖ សុខមាន