ចក្រភពអង់គ្លេសកំពុងពង្រឹងសមត្ថភាពការពារដែនអាកាសរបស់ខ្លួន ដោយមានកិច្ចសន្យាថ្មី សម្រាប់ប្រព័ន្ធមីស៊ីល ខណៈដែលអ្នករៀបចំផែនការយោធាអឺរ៉ុប ធ្វើការដើម្បីរៀបចំផែនការក្រោយសន្តិភាព សម្រាប់អ៊ុយក្រែន ដែលអាចមើលឃើញផ្ទៃមេឃត្រូវបានការពារដោយសម្ព័ន្ធមិត្តលោកខាងលិច។

ក្រសួងការពារជាតិ (MoD) កាលពីថ្ងៃព្រហស្បតិ៍ (ទី២១ ខែសីហា) បានឲ្យដឹងនៅក្នុងសេចក្តីថ្លែងការណ៍មួយថា នៅក្នុងកិច្ចព្រមព្រៀងដែលមានតម្លៃ ១១៨លានផោន (១៥៨លានដុល្លារ) រដ្ឋាភិបាលអង់គ្លេសនឹងទិញប្រព័ន្ធ Land Ceptor ថ្មីចំនួន ៦គ្រឿង ពីក្រុមហ៊ុនផលិតអាវុធពហុជាតិសាសន៍របស់អឺរ៉ុប MBDA ក្នុងរយៈពេល ៣ឆ្នាំ។

កិច្ចព្រមព្រៀងនោះរួមបញ្ចូលនូវអ្វីដែលហៅថា មីស៊ីលពាក់ព័ន្ធនឹងម៉ូឌុលប្រឆាំងដែនអាកាស ដែលមានសមត្ថភាពវាយប្រហារទៅលើវត្ថុដែលមានទំហំតូចប៉ុនកូនបាល់តិន្នីស ដែលធ្វើដំណើរក្នុងល្បឿនសំឡេង ២ដង ក៏ដូចជាជើងទម្របាញ់បង្ហោះ និងយានជំនួយផងដែរ។

កិច្ចសន្យាថ្មីនេះកើតឡើងនៅពេលដែលប្រមុខការពារជាតិអឺរ៉ុប និងអាមេរិក ជួបប្រជុំគ្នា ដើម្បីពិភាក្សាអំពីអ្វីដែលជាការធានាសន្តិសុខដែលបណ្ដាមេដឹកនាំទាំងអស់អាចផ្តល់ឲ្យអ៊ុយក្រែន ប្រសិនបើសម្រេចបានកិច្ចព្រមព្រៀងសន្តិភាព ជាមួយនឹងអ្នកលុកលុយ គឺរុស្ស៊ី។

ប្រព័ន្ធការពារដែនអាកាសត្រូវបានគេមើលឃើញថា ជាគ្រឿងយុទ្ធោបករណ៍ដ៏សំខាន់នៅក្រោមសម្ព័ន្ធឆន្ទៈរួម ដែលជាក្រុមនៃប្រជាជាតិដឹកនាំដោយចក្រភពអង់គ្លេស និងបារាំង។ ក្រុមនេះត្រៀមដាក់ពង្រាយកងទ័ព និងប្រព័ន្ធយោធា នៅឆ្ងាយពីតំបន់ជួរមុខ ក្នុងប្រទេសអ៊ុយក្រែន ក្រោមកិច្ចព្រមព្រៀងមួយដែលប្រទេសទាំងនោះសង្ឃឹមថា នឹងរួមបញ្ចូលជាមួយគាំទ្ររបស់សហរដ្ឋអាមេរិកដែលរួមចំណែកដល់ការចែករំលែកព័ត៌មានស៊ើបការណ៍ ការឃ្លាំមើលព្រំដែន អាវុធ និងអាចជាប្រព័ន្ធការពារដែនអាកាស៕