បើយោងតាមការស្ទង់មតិដែលបានចេញផ្សាយកាលពីថ្ងៃព្រហស្បតិ៍ (ទី២១ ខែសីហា) បានបង្ហាញថា អាជីវកម្មអង់គ្លេសកំពុងមាននូវខែសកម្មខ្លាំងបំផុតជាលើកដំបូង ក្នុងរយៈមួយឆ្នាំ ដោយសារការងើបឡើងវិញនៅក្នុងវិស័យសេវាកម្មសំខាន់ៗជាច្រើន។

លទ្ធផលបឋមរបស់សន្ទស្សន៍គ្រប់គ្រប់ការទិញ (PMI) សម្រាប់ខែសីហា ទំនងជាដំណឹងដ៏គួរឲ្យស្វាគមន៍ សម្រាប់រដ្ឋមន្ត្រីហិរញ្ញវត្ថុ លោកស្រី Rachel Reeves ប៉ុន្តែលទ្ធផលស្ទង់មតិដែលបង្ហាញអំពីសម្ពាធអតិផរណាកាន់តែខ្លាំង អាចបង្កជាក្ដីបារម្ភដល់ធនាគារកណ្ដាលអង់គ្លេស (BoE)។

PMI ដែលគ្របដណ្តប់លើការផលិត ក៏ដូចជាសេវាកម្មផងដែរនោះ បានឡើងដល់ ៥៣ ដែលជាកម្រិតខ្ពស់បំផុតចាប់តាំងពីខែសីហាឆ្នាំមុន ពោលគឺលើសពី ៥១,៥ នៅក្នុងខែកក្កដា។ ការស្ទង់មតិរបស់សារព័ត៌មាន Reuters បានព្យាករថា មានការកើនឡើងតិចតួចដល់ ៥១,៦។

លោក Chris Williamson ប្រធានសេដ្ឋវិទូផ្នែកធុរកិច្ចនៅក្រុមហ៊ុន S&P Global Market Intelligence បាននិយាយថា ការស្ទង់មតិនេះបានបង្ហាញថា ល្បឿននៃកំណើនសេដ្ឋកិច្ច បានហក់ឡើងក្នុងរដូវក្តៅ បន្ទាប់ពីមានការធ្លាក់ចុះ កាលពីនិទាឃរដូវ។

PMI សម្រាប់វិស័យសេវាកម្មនានា បានឡើងដល់ ៥៣,៦ ដោយឡើងពី ៥១,៨ ក្នុងខែកក្កដា។ ប៉ុន្តែ PMI ផលិតកម្ម បានធ្លាក់ចុះពី ៤៨ ទៅ ៤៧,៣ ដែលទាបជាងកម្រិតកំណើន ៥០ និងទាបបំផុតជាលើកដំបូង ក្នុងរយៈពេល ៣ខែ ដោយសាររោងចក្រនានា បានរងគ្រោះដោយសារសង្គ្រាមពាណិជ្ជកម្មពិភពលោក៕