ចំហេះព្រៃបានឆាបឆេះឡើងនៅជិតទីក្រុងទេសចរណ៍ Calistoga របស់រដ្ឋកាលីហ្វ័រនីញ៉ា សហរដ្ឋអាមេរិក កាលពីថ្ងៃព្រហស្បតិ៍ (ទី២១ ខែសីហា) ដោយបានជំរុញឲ្យមានការជម្លៀសចេញពីកន្លែងផលិតស្រា នៅក្បែរនោះ និងពីលំនៅឋាន នៅតាមតំបន់ជនបទមួយចំនួន។

យោងតាមនាយកដ្ឋានការពារព្រៃឈើ និងអគ្គិភ័យរបស់រដ្ឋកាលីហ្វ័រនីញ៉ា បានឲ្យដឹងថា ចំហេះព្រៃ Pickett Fire បានឆាបឆេះរាលដាលយ៉ាងលឿនលើផ្ទៃដីដល់ទៅ ៤,២គីឡូម៉ែត្រការ៉េ នៅលើភ្នំនៃតំបន់ស្រា Napa Valley។ 

រដ្ឋកាលីហ្វ័រញ៉ា កំពុងឈានចូលដល់រដូវកាលចំហេះព្រៃខ្លាំងបំផុត បន្ទាប់ពីមាននូវកម្ដៅក្ដៅខ្លាំងជាច្រើនខែ ខណៈមានភ្លៀងធ្លាក់តិចតួច។ រដ្ឋនេះមានចំហេះព្រៃសកម្មចំនួន ៩ ដែលរួមមានទាំងចំហេះដ៏ធំ Gifford Fire ដែលបានឆាបឆេះផ្ទៃដីជាង ៥២៦គីឡូម៉ែត្រការ៉េ នៅតំបន់ដាច់ស្រយាលភាគច្រើន ក្នុងតំបន់ San Luis Obispo និង Santa Barbara។

ជាមួយគ្នានេះ សីតុណ្ហភាពក្តៅហួតហែង កំពុងបង្កើនហានិភ័យឲ្យមានចំហេះព្រៃកាន់តែខ្លាំងឡើងៗ។ យោងតាមមជ្ឈមណ្ឌលព្យាករអាកាសធាតុអាមេរិក បានឲ្យដឹងថា ការព្រមានអំពីកម្ដៅមានសុពលភាពនៅទូទាំងរដ្ឋកាលីហ្វ័រនីញ៉ាភាគច្រើន ដោយរំពឹងថា សីតុណ្ហភាពនឹងឡើងខ្ពស់ដល់ចន្លោះពី ៣២ ទៅ ៣៨អង្សាសេ នៅចុងសប្តាហ៍នេះ។

គួរបញ្ជាក់ដែរថា រដ្ឋកាលីហ្វ័រនីញ៉ាភាគខាងត្បូង មិនទាន់បានប្រសើរឡើងនៅឡើយទេ ដោយសារចំហេះព្រៃ កាលពីខែមករា ដែលបានដុតបំផ្លាញផ្ទះសម្បែងរាប់ពាន់ខ្នងទាំងនៅក្នុង និងជុំវិញទីក្រុង Los Angeles៕