ប្រភពដែលដឹងអំពីបញ្ហា កាលពីថ្ងៃព្រហស្បតិ៍ (ទី២១ ខែសីហា) បានប្រាប់សារព័ត៌ Reuters ថា ក្រុមហ៊ុន Google បានឈានដល់កិច្ចព្រមព្រៀងលើកុំព្យូទ័រក្លោដរយៈពេល ៦ឆ្នាំ ជាមួយក្រុមហ៊ុន Meta Platforms ដែលមានតម្លៃជាង ១០ពាន់លានដុល្លារ ដែលជាកិច្ចព្រមព្រៀងដ៏ធំទី២ របស់ក្រុមហ៊ុនស្រាវជ្រាវយក្សថ្មីៗនេះ បន្ទាប់ពីមានកិច្ចសន្យាមួយជាមួយក្រុមហ៊ុន OpenAI។

ប្រភពដែលបានសុំមិនបញ្ចេញឈ្មោះ បាននិយាយថា នៅក្រោមកិច្ចព្រមព្រៀងនេះ ក្រុមហ៊ុន Meta នឹងប្រើប្រាស់ម៉ាស៊ីនមេ កន្លែងផ្ទុកទិន្នន័យ បណ្តាញ និងសេវាកម្មផ្សេងទៀតរបស់ Google Cloud។

ពាក់ព័ន្ធនឹងការលើកឡើងនេះ ទាំងក្រុមហ៊ុន Google និង Meta មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ កិច្ចព្រមព្រៀងនេះត្រូវបានរាយការណ៍ដំបូងគេដោយសារព័ត៌មាន Information។

ព័ត៌មាននេះកើតឡើងបន្ទាប់ពីមានការអត្ថាធិប្បាយរបស់នាយកប្រតិបត្តិរបស់ក្រុមហ៊ុន Meta លោក Mark Zuckerberg កាលពីខែកក្កដា ដែលថា ក្រុមហ៊ុនរបស់លោកនឹងចំណាយប្រាក់រាប់រយពាន់លានដុល្លារ ដើម្បីបង្កើតមជ្ឈមណ្ឌលទិន្នន័យ AI (បញ្ញាសិប្បនិម្មិត) ដ៏ធំជាច្រើន៕