ទីក្រុងរបស់ប្រទេសជប៉ុន នឹងជំរុញឲ្យអ្នកប្រើប្រាស់ស្មាតហ្វូនទាំងអស់កំណត់ពេលវេលាលើអេក្រង់ត្រឹម ២ម៉ោង ក្នុងមួយថ្ងៃ នៅខាងក្រៅម៉ោងការងារ ឬសាលារៀន ក្រោមសំណើនៃបទប្បញ្ញត្តិដែលមិនរួមបញ្ចូលនូវការពិន័យអ្វីឡើយ។

បើយោងតាមសេចក្តីព្រាងច្បាប់នេះ បានបង្ហាញថា ការកំណត់ដែលនឹងត្រូវបានណែនាំដល់អ្នករស់នៅទាំងអស់ ក្នុងទីក្រុង Toyoake នៅភាគកណ្តាលនៃប្រទេសជប៉ុន នឹងមិនមានចំណងផ្លូវច្បាប់ឡើយ ហើយនឹងមិនតម្រូវឲ្យមានការផាកពិន័យអ្វីទាំងអស់ ប្រសិនបើការប្រើប្រាស់លើសពីពេលវេលាកម្រិតនោះ។

នៅក្នុងសេចក្តីថ្លែងការណ៍មួយ នាថ្ងៃសុក្រ (ទី២២ ខែសីហា) នេះ អភិបាលក្រុង លោក Masafumi Koki បានបញ្ជាក់ថា សំណើនេះមានគោលបំណង «ទប់ស្កាត់ការប្រើប្រាស់ឧបករណ៍នេះហួសហេតុ ដែលបណ្តាលឲ្យមានបញ្ហាដល់សុខភាពទាំងផ្លូវកាយ និងផ្លូវចិត្ត ក្នុងនោះរួមមានទាំងបញ្ហាគេងផងដែរ»។

សេចក្តីព្រាងច្បាប់នេះ ជំរុញឲ្យសិស្សសាលាបឋមសិក្សា ចៀសវាងការប្រើប្រាស់ទូរសព្ទទំនើប ក្រោយម៉ោង ៩:០០យប់ ហើយសិស្សវិទ្យាល័យ និងខ្ពស់ជាងនេះ ត្រូវបានណែនាំមិនឲ្យប្រើប្រាស់វាក្រោយម៉ោង ១០:០០យប់។ ចំណាត់ការនេះបានជំរុញឲ្យមានប្រតិកម្មតាមប្រព័ន្ធអ៊ីនធឺណិត ដោយមនុស្សជាច្រើន បានហៅផែនការនេះថា មិនមានភាពប្រាកដនិយម។

អ្នកប្រើប្រាស់ម្នាក់ បានសរសេរនៅលើបណ្ដាញសង្គម X ថា៖ «ខ្ញុំយល់ពីបំណងរបស់ពួកគេ ប៉ុន្តែការកំណត់រយៈពេល ២ម៉ោង គឺមិនអាចទៅរួចទេ»។ ចំណែកម្នាក់ទៀតបានសរសេរថា៖ «រយៈពេល ២ម៉ោង ខ្ញុំមិនអាចសូម្បីតែអានសៀវភៅ ឬមើលកុន (នៅលើស្មាតហ្វូនរបស់ខ្ញុំ)»។ រីឯអ្នកខ្លះទៀតបានលើកឡើងថា ការប្រើប្រាស់ទូរសព្ទស្មាតហ្វូន គួរតែជាការសម្រេចចិត្តដោយផ្ទាល់របស់ក្រុមគ្រួសារនីមួយៗ៕