វ៉ូវីណាម៖ សហព័ន្ធកីឡាវ៉ូវីណាមកម្ពុជាបានប្រកាសនឹងរៀបចំ ការប្រកួតជ្រើសរើសជើងឯកថ្នាក់ជាតិប្រចាំឆ្នាំ២០២១ នាសប្ដាហ៍ក្រោយចាប់ពីថ្ងៃទី២៤ ដល់ថ្ងៃទី២៦ ខែមករា ឆ្នាំ២០២២។ លោក យ៉ាំ ថៃសាន អគ្គលេខាធិការសហព័ន្ធបានឲ្យដឹងថា ជើងឯកថ្នាក់ជាតិឆ្នាំនេះគឺរៀបចំចំនួន ១៦វិញ្ញាសាក្នុងនោះមានវិញ្ញាសាមេគុនឯកត្តជន ៦វិញ្ញាសា, វិញ្ញាសារមេគុនក្រុមចម្រុះ ៣នាក់ ២វិញ្ញាសា និងវិញ្ញាសាប្រយុទ្ធមាន ៨វិញ្ញាសា។
ចំពោះលក្ខខណ្ឌចូលរួមសមាគម/ក្លិបទាំងអស់មានសិទ្ធចុះឈ្មោះកីឡាករ-កីឡាការិនីបានតែ ១រូប ឬ ១ក្រុមប៉ុណ្ណោះក្នុង ១វិញ្ញាសា តែក្នុងកីឡាករ-កីឡាការិនីម្នាក់គឺអាចប្រកួតបាន ៣វិញ្ញាសា។ រីឯការចុះឈ្មោះក្នុងមួយសមាគម ឬក្លិប សហព័ន្ធអនុញ្ញាតឲ្យចូលរួមបានតែ ៦នាក់ប៉ុណ្ណោះ។ អគ្គលេខាធិការសហព័ន្ធដដែលបន្ដថា ការប្រកួតប្រចាំឆ្នាំនេះរៀបចំឡើងដើម្បីផ្ដល់ឱកាសឲ្យកីឡាករ-កីឡាការិនីបានបញ្ចេញសមត្ថភាព បច្ចេកទេស និងទេពកោសល្យ ពិសេសជាឱកាសពង្រឹងសមត្ថភាពរបស់កីឡាករ-កីឡាការិនី ក៏ដូចជាមន្ដ្រីបច្ចេកទេសរៀបចំការប្រកួតដើម្បីត្រៀមដំណើរឆ្ពោះទៅស៊ីហ្គេមឆ្នាំ២០២៣។ លោកបន្ថែមថា ដើម្បីជំរុញឲ្យការប្រកួតថ្នាក់ជាតិនេះ ស្របតាមនិយាមបច្ចេកទេសសហព័ន្ធ និងមានភាពយុត្តិធម៌ក្នុងការកាត់សេចក្ដី សហព័ន្ធក៏នឹងរៀបចំវគ្គបណ្ដុះបណ្ដាលចៅក្រម និងអាជ្ញាកណ្ដាលកម្រិត «ក» ប្រចាំឆ្នាំ២០២១ នៅថ្ងៃទី២៣ ខែមករាចុងសប្ដាហ៍នេះមុនការប្រកួតផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
