ការិយាល័យអគ្គរដ្ឋអាជ្ញាសាធារណៈសហព័ន្ធអាល្លឺម៉ង់ បាននិយាយថា បុរសជនជាតិអ៊ុយក្រែនម្នាក់ ត្រូវបានចាប់ខ្លួន នៅក្នុងប្រទេសអ៊ីតាលី ដោយសង្ស័យថា មានជាប់ពាក់ព័ន្ធក្នុងការបំផ្លិចបំផ្លាញបំពង់បង្ហូរប្រេង Nord Stream និង Nord Stream 2 ។

យោងតាមការិយាល័យនេះ  នៅយប់ថ្ងៃទី២១ ខែសីហាឆ្នាំ ២០២៥ ដោយផ្អែកលើដីកាចាប់ខ្លួនអឺរ៉ុបដែលចេញដោយចៅក្រមស៊ើបអង្កេតនៃតុលាការសហព័ន្ធ នៅថ្ងៃទី ១៨ ខែសីហា ឆ្នាំ ២០២៥ ពលរដ្ឋអ៊ុយក្រែនឈ្មោះ Sergey K. ត្រូវបានចាប់ខ្លួនដោយកងកម្លាំងនគរបាលជាតិ ក្នុងប្រតិបត្តិការរួមគ្នាជាមួយសេវាកម្មសហប្រតិបត្តិការនគរបាលអន្តរជាតិ នៅក្នុងខេត្ត Rimini របស់ប្រទេសអ៊ីតាលី»។ សេចក្តីថ្លែងការណ៍ បានបញ្ជាក់ថា បុរសនេះ «ត្រូវបានគេសង្ស័យថា មានការជាប់ព័ន្ធក្នុងការរៀបចំការបំផ្ទុះ និងការបំផ្លិចបំផ្លាញដោយខុសច្បាប់»។

តុលាការអាល្លឺម៉ង់ បាននិយាយថា Sergey K. គឺជាផ្នែកមួយនៃក្រុមបុគ្គលដែលបានបង្កៃឧបករណ៍ផ្ទុះនៅលើបំពង់បង្ហូរឧស្ម័ន Nord Stream និង Nord Stream 2 នៅជិតកោះ Bornholm ក្នុងខែកញ្ញា ឆ្នាំ ២០២២»។ ទីភ្នាក់ងារនេះ បាននិយាយថា៖«អ្នកជាប់ឃុំត្រូវបានសង្ស័យថា ជាអ្នកសម្របសម្រួលមួយនៃប្រតិបត្តិការនេះ។ បុរសនេះ និងបក្ខពួករបស់ខ្លួន បានប្រើប្រាស់ទូកក្ដោង ដែលបានចាកចេញពីទីក្រុង Rostock ជាមធ្យោបាយដឹកជញ្ជូន»។

យោងតាមការិយាល័យរដ្ឋអាជ្ញា ទូកនេះ ត្រូវបានជួលពីក្រុមហ៊ុនអាល្លឺម៉ង់ដោយអ្នកសម្របសម្រួលដែលបានប្រើឯកសារអត្តសញ្ញាណក្លែងក្លាយ។ ការិយាល័យរដ្ឋអាជ្ញាអាល្លឺម៉ង់ បានកត់សម្គាល់ថា៖«គ្រឿងផ្ទុះនោះ បានបំផ្ទុះ នៅថ្ងៃទី ២៦ ខែកញ្ញា ឆ្នាំ ២០២២។ ជាលទ្ធផលនៃការផ្ទុះនោះ បំពង់បង្ហូរឧស្ម័នទាំងពីរ ត្រូវបានខូចខាតយ៉ាងធ្ងន់ធ្ងរ»។ ពួកគេក៏បាននិយាយផងដែរថា បុរសនេះ នឹងបង្ហាញខ្លួននៅចំពោះមុខចៅក្រមស៊ើបអង្កេតរបស់តុលាការសហព័ន្ធ បន្ទាប់ពីការធ្វើបត្យាប័នពីប្រទេសអ៊ីតាលី។