អាជ្ញាធរកំពង់ផែទួរគី បានចាប់ផ្តើមទាមទារជាផ្លូវការនូវភ្នាក់ងារដឹកជញ្ជូនឲ្យមានលិខិតដែលប្រកាសថា នាវារបស់ពួកគេ មិនមានទំនាក់ទំនងជាមួយអ៊ីស្រាអែល ហើយមិនដឹកជញ្ជូនសម្ភារៈយោធា ឬទំនិញដែលមានគ្រោះថ្នាក់សម្រាប់ប្រទេសនេះ។ នេះបើយោងតាមប្រភពដឹកជញ្ជូនពីរ។

ប្រភពបាននិយាយថា ការិយាល័យរបស់ប្រធានកំពង់ផែ បានណែនាំផ្ទាល់មាត់ដល់ភ្នាក់ងារកំពង់ផែឲ្យផ្តល់ការធានាជាលាយលក្ខណ៍អក្សរ ដោយបន្ថែមថា មិនមានសារាចរផ្លូវការអំពីបញ្ហានេះទេ។

ប្រភពមួយក្នុងចំណោមប្រភពទំាងនោះ បាននិយាយថា ការណែនាំនេះ បានអនុវត្តចំពោះកំពង់ផែនានានៅទូទាំងប្រទេសទួរគី។

ប្រភពទី២ បាននិយាយថា លិខិតធានាគួរតែបញ្ជាក់ថា ម្ចាស់នាវា អ្នកគ្រប់គ្រង និងប្រតិបត្តិករ មិនមានទំនាក់ទំនងជាមួយអ៊ីស្រាអែលទេ ហើយប្រភេទទំនិញមួយចំនួន រួមទាំងសារធាតុផ្ទុះ និងសារធាតុវិទ្យុសកម្ម ឬគ្រឿងយុទ្ធោបករណ៍ មិនមាននៅលើនាវា ដែលកំពុងធ្វើដំណើរទៅកាន់ប្រទេសអ៊ីស្រាអែលនោះទេ។

ក្រសួងដឹកជញ្ជូន មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយទេ។

កាលពីឆ្នាំមុន ប្រទេសទួរគី បានផ្តាច់ពាណិជ្ជកម្មជាមួយអ៊ីស្រាអែល ដែលមានតម្លៃ ៧ ពាន់លានដុល្លារក្នុងមួយឆ្នាំ ជុំវិញសង្រ្គាមរបស់ខ្លួននៅហ្កាហ្សា ជាមួយក្រុមសកម្មប្រយុទ្ធប៉ាឡេស្ទីនហាម៉ាស។